Большасць затрыманых 6 ліпеня ўдзельнікаў акцыі пратэсту пакараныя арыштамі 1

Паводле звестак праваабаронцаў, у Мінску асуджаныя 119 удзельнікаў акцыі маўклівага пратэсту 6 ліпеня. Усяго ў сталіцы было затрымана прыкладна 190 чалавек.

Асуджаныя пакараныя адміністрацыйнымі арыштамі на тэрмін ад 5 да 15 сутак і штрафамі ў памеры ад 10 да 30 базавых велічынь. Астатні затрыманыя былі адпушчаныя без санкцый. Звестак пра асуджаных па рэгіёнах у праваабаронцаў пакуль няма.

Раней паведамлялася, што падчас акцыі маўклівага пратэсту вечарам 6 ліпеня ў розных гарадах Беларусі было затрымана каля 400 чалавек. Гэта — звесткі праваабаронцаў. Афіцыйная інфармацыя па затрыманых так і не была абнародавана.

Усяго з 8 чэрвеня за час правядзення акцый маўклівага пратэсу, арганізаваных інтэрнэт-супольнасцю «Рэвалюцыя праз сацыяльныя сеткі», у Беларусі было затрымана каля 1.730 чалавек, у тым ліку 77 журналістаў. Паводле звестак РГА «Беларуская асацыяцыя журналістаў», 15 чэрвеня было затрымана дзевяць работнікаў СМІ, 22 чэрвеня — восем, 29 чэрвеня — 12, 3 ліпеня — 20. Найбольшая колькасць журналістаў — 28 чалавек — затрымана падчас апошняй акцыі, 6 ліпеня.

Арганізатары акцый маўклівага пратэсту заяўляюць аб намеры працягваць іх, нягледзячы на рэпрэсіі з боку ўлад.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ