Міраслаў Лайчак, высокі прадстаўнік Эўрапейскай службы замежнапалітычнай дзейнасьці, выказаў упэўненасьць, што санкцыі, уведзеныя Эўразьвязам у адносінах да прадстаўнікоў афіцыйнага Менску, прыносяць плён.
На думку Лайчака, апошнія акцыі маўклівага пратэсту ў Беларусі сьведчаць, што Аляксандар Лукашэнка траціць свой татальны кантроль над краінаю:
«Гэта дае нам вельмі ясны сыгнал, што рэжым траціць кантроль. Яно відаць, у прыватнасьці, з таго, што апошнія дэманстрацыі не былі абумоўленыя палітычнымі матывамі, а былі выкліканыя цяжкім эканамічным і сацыяльным становішчам людзей. Вось жа тое, што адбываецца цяпер у Беларусі, мае вялікае значэньне».
Зь леташняга сьнежня Міраслаў Лайчак займае пасаду
На сёньняшні дзень у сьпіс прадстаўнікоў афіцыйнага Менску, на якіх пашыраюцца візавыя і фінансавыя санкцыі Эўразьвязу, уключаныя 193 чалавекі і 3 юрыдычныя асобы.
Лайчак адмовіўся спэкуляваць на тэму,
ці дапоўняць міністры замежных справаў краін Эўрапейскага Зьвязу названы сьпіс — у адказ на рэпрэсіі ўладаў Беларусі ў адносінах да ўдзельнікаў маўклівых пратэстаў:
«Я думаю, прынятыя меры працуюць. Гэта прызнаюць дэмакратычныя сілы ў Беларусі. Гэта меры, якія не даюць вынікаў адразу, але няма сумневу, што яны прыносяць плён. Няма сумневу, што рэжым вельмі добра разумее і адчувае ўсе гэтыя меры. Мы стараемся, каб нашыя пасланьні рэжыму ў Менску былі гранічна ясныя. Мы ня будзем мець зь ім дачыненьняў да часу, пакуль ён ня вызваліць і не рэабілітуе ўсіх палітычных вязьняў».
Лайчак таксама адрэагаваў на нядаўнія словы Аляксандра Лукашэнкі пра гатовасьць выслаць усіх беларускіх палітвязьняў у Эўрапейскі Зьвяз:
«Мы прызвычаіліся да дзіўных, сьмешных, несур’ёзных Лукашэнкавых заяваў, і гэтая заява — адна з такіх. Мы хочам нармалізацыі сытуацыі ў Беларусі і павагі да эўрапейскіх каштоўнасьцяў, да закону, да правоў, якія гарантаваныя грамадзянам Беларусі іх канстытуцыяй, аднак не забясьпечваюцца ў рэальным жыцьці. Гаворка не пра тое, што Эўрапейскі Зьвяз хоча забраць тую ці іншую асобу і прыняць яе на нашай тэрыторыі, гаворка пра тое, каб палепшыць умовы для жыцьця людзей у Беларусі. Такіх сыгналаў і знакаў мы чакаем ад Менску, але дасюль не атрымліваем».
Эўрапейская служба замежнапалітычнай дзейнасьці пакуль што ўстрымліваецца ад далейшых абмежавальных захадаў у адносінах да афіцыйнага Менску, у прыватнасьці ад выключэньня Беларусі з праграмы «Ўсходняе партнэрства». Міраслаў Лайчак падкрэсьліў, што пры кожным наступным кроку з боку Эўразьвязу трэба ўлічваць узьдзеяньне, якое ён можа мець для беларускага жыхарства:
«Пры нашых намаганьнях мы стараемся дакладна вывяраць падыходы, каб быць цьвёрдымі ў адносінах да рэжыму і да тых, хто асабіста бярэ ўдзел у антыдэмакратычных дзеяньнях, і ў той жа час не пакараць невінаватых грамадзянаў, не адказных за тое, што адбываецца. Вось жа ўсе прапановы, якія мы разглядаем, ацэньваюцца менавіта з гэтай пэрспэктывы».
