«Канечне, баімся страціць працу. Але ў нас малое дзіця, хочацца, каб яно жыло ў свабоднай краіне і без страху», кажа жонка Сяргея Крукоўскага і просіць аб дапамозе.
Сяргей Крукоўскі (тады яшчэ не ведалі яго імя і прозвішча) стаў героем фотарэпартажу Еўрарадыё з адной з чэрвеньскіх маўклівых акцый (фота было вельмі папулярным у сацыяльных сетках). Тады ён застаўся на волі, а ў сераду,13-га , патрапіў за краты. Людзі ў цывільным схапілі яго на сталічнай плошчы Якуба Коласа. Сяргей быў асуджаны на 8 сутак арышту.
Сяргей сядзіць на сутках, затое ўдалося пагутарыць з ягонай жонкай Аленай.
Раскажыце, што насамрэч у Сяргея «бэтманаўскага» ёсць, бо ён выглядае як сапраўдны кінагерой, калі яго нясуць у аўтобус?
«Насамрэч ён ніякая не зорка — сціплы хлопец, ніколі нічым не кічыўся. Проста ён такі пазітыўны чалавек у жыцці і не маркоціцца нават у самых складаных сітуацыях».
Ці на ўсе акцыі ходзіць Сяргей?
Алена: «Не, ён хадзіў не на ўсе акцыі. Мы хадзілі на нейкую з першых акцыяў, калі з’явіліся гэтыя фатаздымкі, але справа ў тым, што ў яго дастаткова складаная праца і ён увесь час загружаны».
Калі не сакрэт, якая праца, чым займаецца ваш муж?
Алена: «Ён працуе у будаўнічай арганізацыі майстрам, на будоўлі працуе».
А як да гэтага ставяцца калегі па працы? Ці ёсць нейкая салідарнасць з Сяргеем?
Алена: «Я хадзіла на адну з акцыяў. І хадзілі нейкія яго сябры. Я ведаю, што на працы яго людзі падтрымоўваюць, але не думаю, што там нехта выходзіў на вуліцы. Бо, вы ж разумееце, у людзей страх, страх згубіць працу, а тыя, хто могуць перакрочыць праз свой страх, тыя выходзяць на вуліцу».
Сяргей не баіцца страціць працу?
Алена:. «Думаю, што баіцца.
Але сітуацыя, якая склалася ў нас у краіне, так прыціснула, што няма сілаў цярпець гэта ўсё і страх адступіў на нейкае другое месца.У нас малое дзіця, хочацца, каб гэтае дзіцё жыло ў вольнай краіне і жыло без страху. Дзеля дзіцяці вырашылі выказаць такі пратэст».
Ведаем, што Сяргей сядзіць «на сутках». Колькі яму далі?
Алена: «Яго арыштавалі на 8 сутак. Суд быў поўным абсурдам. Мы выбівалі адваката, мы хадайнічалі, каб выклікалі двух сведкаў, якія сведчаць, што ён там „нецэнзурна лаяўся, махаў рукамі і перашкаджаў грамадскаму парадку“. Не ведаю, ці мы выклікалі яшчэ большы гнеў суддзі,
але гэта прагучала, як здзек, калі яна сказала, што ўлічваючы, што ў нас маленькае дзіця і гэта змякчальная абставіна — і майму мужу даюць 8 сутак.
Мне зараз самае галоўнае — знайсці хоць некалькіх сведкаў, якія тады былі на плошчы і могуць пацвердзіць, што мой муж у момант затрымання размаўляў па тэлефоне і нікога не чапаў. Яшчэ ўчора мы падалі скаргу ў гарадскі суд. У панядзелак будзе разгляд гэтай справы і калі будуць паказанні сведкаў, то я спадзяюся, што мы нешта зможам зрабіць».
* * *
Алена Крукоўская шукае сведак здарэння, каб у судзе абскардзіць прысуд. Бацьку 9-месячнага дзіцяці асудзілі на 8 сутак адміністрацыйнага арышту нібыта за лаянку.
Тэлефон: + 375 44 714 54 13
Цяпер чытаюць
Муж Сямашкі быў не адзіным, хто атрымаў пашпарт прыкрыцця 13 лютага 2018 года19
Каментары