Фотафакт: У драўлянай царкве XVII ст. зрабілі «красіва»
Царква Праабражэння Гасподняга ў Порплішчы Докшыцкага раёна перажыла чарговы рамонт.
Царква Праабражэння Гасподняга ў Порплішчы Докшыцкага раёна перажыла чарговы рамонт.
Два гады таму драўляную царкву XVII ст. у вёсцы Порплішча часткова пакрылі сайдынгам. Сёлета рамонт правялі ўнутры царквы — інтэр’ер унікальнага храма зафарбоўваецца алейнымі фарбамі. На думку старшыні добраахвотнага таварыства аховы помнікаў Антона Астаповіча гэта з’яўляецца крымінальным злачынствам. Ён звярнуўся ў пракуратуру раёна з лістом, у якім просіць прыцягнуць ад адказнасці арганізатараў і выканаўцаў працаў у царкве ў адпаведнасці з ч.2 арт. 344 КК за наўмыснае пашкоджанне гісторыка-культурнай каштоўнасці групай асобаў.
Выпадак з царквой у Порплішчы, калі царкоўны прыход сумесна з святаром прарабляюць храмы на свой капыл, часта без ведама адпаведных органаў улады, не адзінкавыя. Найбольш распаўсюджаным з’яўляецца чаплянне купалаў-цыбулін на дахі бажніцаў, якім такія абнаўленні не падыходзяць па стылі і характары. Так, у 2008 годзе ў Клецку мясцовы настаяцель усталяваў «цыбуліны» на дах былога Дамініканскага касцёла. Летась купалы-цыбуліны з’явіліся на царкве Барыса і Глеба ў Навагрудку. А драўляную царкву ў Гошчаве Івацэвіцкага раёна ўпрыгожылі «цыбулінамі», шклопакетамі і сайдынгам у 2008 годзе. І гэта далёка не поўны спіс.
***
Царква Праабражэння Гасподняга ў Порплішчы. Вось што пра яе піша «Беларуская энцыклапедыя»: У цэнтры вёскі, насупраць касцёла, каля дарогі Докшыцы — Глыбокае. Пабудавана ў 1627 г. з дрэва як уніяцкая. Адноўлена ў 1794 г., асвячона пасля капітальнай перабудовы 18.10.1881 г., у 1884 г. прыбудавана званіца.
Помнік народнага дойлідства з рысамі класіцызму. Храм вырашаны выцягнутым па падоўжнай восі крыжова-купальным аб'ёмам. Скрыжаванне 2-схільных дахаў прамавугольных трапезнай, апсіды і бакавых прыдзелаў завершана магутным 8-гранным светлавым барабанам, перакрытым паўсферычным купалам з падкрыжавым ліхтаром. Над прытворам надбудаваны 2 чацверыковыя ярусы званіцы, завершанай шатром.
У інтэр'еры сяродкрыжжа перакрыта 8-гранным купалам на падпружных арках. У бабінцы на 2 слупах размешчаны хоры. У іканастасе выкарыстаны фрагменты ўцалелага разнога драўлянага ўніяцкага алтара XVIII ст., ён пакрыты разным раслінна-арнаментальным дэкорам у стылі барока, упрыгожаны драўлянай скульптурай анёлаў, дэкаратыўнымі вазамі.
Каментары