Польскі палітык Лепэр рэалізоўваў у Беларусі выгадныя гешэфты 9

Польскі палітык, былы віцэ-прэм’ер і міністр сельскай гаспадаркі Польшчы Анджэй Лепер, які забіў сябе, незадоўга да смерці атрымаў ад беларускіх уладаў згоду на арэнду вялікага абшару лесу.

Пра гэта піша польскі таблоід «Super Express».

Лепер меў гнаць беларускую драўніну ў Польшчу. Доступ да такога прыроднага рэсурсу ў Беларусі мае толькі пэўнае кола асобаў. Скажам, знакаміты шведскі канцэрн «Ікеа» ў беларускую дрэваапрацоўку так і не пусцілі.

Газета піша, што гандаль драўнінай быў не адзінай крыніцай заробку Лепера ў Беларусі.

Былы прэс-сакратар палітыка Матэуш Піскорскі напісаў у сваім блогу, што беларусы прапанавалі Леперу распрацаваць маштабную праграму рэструктурызацыі сельскай гаспадаркі.

Лепэр быў палітыкам-папулістам. Па меры росту дабрабыту палякаў у ЕС ягоная папулярнасць падала. Да таго ж, ён уляпаўся ў брудны сэкс-скандал, выявіліся і брудныя афёры з зямельнымі ўчасткамі. У выніку гэтага ягоная партыя «Самаабарона» страціла ўсякую папулярнасць. Затое

гэты экс-палітык быў жаданым гасцём на тэлеэкранах Беларусі. Ён нават выступаў на так званых «усебеларускіх народных сходах» — прапагандысцкіх шоу, якія Аляксандра Лукашэнка ладзіць на дзяржаўныя грошы ў часе выбарчых кампаній.

У сувязі са смерцю лідара «Самаабароны» спачуванні выказаў асабіста Лукашэнка.

Сяргей Гезгала

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ