Зняволены па факце нападу на будынак бабруйскага КДБ
Яўген Васьковіч адбывае пакаранне ў магілёўскай папраўчай калоніі № 15. У ёй утрымліваўся і вызвалены палітвязень Аляксандр Малчанаў. Ён і апавёў пра тое, што адбываецца ў турме з Васьковічам.«Ён стараецца не выконваць патрабаванні адміністрацыі. На яго пастаянна складаюць рапарты. Практычна кожны тыдзень яго адпраўляюць у штрафны ізалятар. Думаю, што яго цяпер накіруюць у памяшканне камернага тыпу й праз некалькі месяцаў будуць пераводзіць на ўмовы турэмнага рэжыму. Ён называе адміністрацыю калоніі прадстаўнікамі фашысцкай улады. Ён робіць усё, што ад яго залежыць.
Ён хоча змагацца, нават знаходзячыся ў турме. Цяпер адзінае, што ён можа зрабіць, — гэта супраціўляцца адміністрацыі».
Маці Васьковіча Рушанія Іванаўна пацвярджае словы Аляксандра Малчанава:
«Лісты пішу яму кожны тыдзень, а адказу няма. Я ездзіла ў жніўні да яго, але мне не далі ні спаткання, ні перадачу не ўзялі. Сказалі, што да снежня можаце ня рухацца нікуды. Ён не выконвае ніводнага патрабавання, я размаўляла з начальнікам атраду. Таму ён усяго пазбаўлены».
Яўген Васьковіч на судзе сёлета 18 мая прызнаў, што ўдзельнічаў у падпале будынку КДБ у Бабруйску, аднак не пакаяўся ва ўчыненым.У апошнім сваім слове ён заявіў:
«Я буду з годнасцю пераносіць усе пакуты, якія паўстануць на маім жыццёвым шляху. Я літвін,
мой святы абавязак — абарона нацыянальных беларускіх каштоўнасцяў. За іх я памерці гатовы. Жыццё кароткае — радзіма вечная. Жыве Беларусь».
Дзяніс Садоўскі, адказны сакратар стваранай партыі Беларуская хрысціянская дэмакратыя, да якой належаў Васьковіч, падкрэслівае, што Яўген Васьковіч — палітвязень. БХД, кажа Садоўскі, не падтрымлівае таго, што ўчыніў Васьковіч, але і не адракаецца яго.
«Мы вядзем працу й з праваабарончымі арганізацыямі, каб Яўген Васьковіч уваходзіў у спісы палітвязьняў, якія павінны быць вызваленыя. Вердыкт, які яму вынеслі, несправядлівы. Мы патрабуем сумленнага судовага разбору. Калі ўсё ж ён тое і ўчыніў, то ўмоўны тэрмін дастатковы ў гэтай сітуацыі».
У тым, што справа Васьковіча вартая перагляду, перакананы праваабаронца Ўладзімер Лабковіч: «У дзеяннях спадара Васьковіча нават калі й можна ўгледзець рысы крымінальнага злачынства, то прысуд адназначна палітычна матываваны. Вырак, які яму быў вынесены, абсалютна не адэкватны ўчыненаму.І той тэрмін, які гэты малады чалавек адбыў, мы лічым дастатковым, каб ён панёс пакаранне за свой учынак. Ён даўно меўся б быць на волі».
Разам з Яўгенам Васьковічам у нападзе на бабруйскі КДБ удзельнічалі прыхільнікі анархісцкіх ідэяў Арцём Пракапенка і Павал Сырамалотаў. Яны віну прызналі й пакаяліся. На вырак гэта, аднак, не паўплывала. Усім тром далі па сем гадоў калоніі ўзмоцненага рэжыму. Бабруйскі суд прызнаў іх вінаватымі ў злосным хуліганстве і ў наўмысным нанясеньні шкоды ў асабліва буйных памерах.
Паводле выраку і заявы дзяржаўнага абвінаваўцы, дзеянні падсудных маглі прывесці да знішчэння ўсяго будынку КДБ. Страты маглі скласці блізу двух мільярдаў рублёў. Рэальныя ж пашкоджанні будынку ад дзвюх бутэлек з «кактэйлем Молатава», якія хлопцы кінулі ў яго ў ноч з 16 на 17 кастрычніка 2010 года, склалі 253 тысячы рублёў.
