У Вілейцы беларусізавалі знак з буслянкай на ўездзе. Будаўнікі не пачыналі рамонт, пакуль буслы не адляцелі з гнязда.
Як распавяла начальнік аддзела архітэктуры і будаўніцтва Вілейскага райвыканкама Галіна Кажарновіч, працы пачалі пасля таго, як з гнязда на ёй у пачатку жніўня паляцелі буслы. Пра тое, каб не патрывожыць птушак, прасіў аўтар ідэі «буслянкі» на знаку Сяргей Казлоўскі.
Знак быў усталяваны ў пачатку 1980-х. Яго аўтарам з'яўляецца як раз Галіна Кажарновіч, яна тады толькі прыехала на працу ў Вілейку пасля заканчэння ВНУ, і гэта быў яе першы праект. З ідэяй зрабіць на стэле гняздо буслоў прыйшоў, як ужо сказана вышэй, Сяргей Казлоўскі, які працаваў тады кіроўцам аўтобуснага парку. Цяпер ён пенсіянер. Мала хто верыў, што птушкам спадабаецца гэта тлумнае месца, але каркас для гнязда стварылі. У першую ж вясну на ім пасяліліся буслы.
Падчас рэканструкцыі надпіс "Вілейка" зрабілі па-беларуску. Абнавіўся і год заснавання Вілейкі. Горад стаў старэйшым на 139 гадоў. Раней лічылася, што ён упершыню згадваецца ў 1599 годзе. Але краязнаўцы адшукалі дакументы з згадкай пра Вілейку пад 1460. Менавіта гэты год цяпер значыцца на ўязным знаку з боку Маладзечна.
