Саннікаў: Ратуйце Дашкевіча любымі спосабамі. «Інакш ён не выжыве!»

«Ратуйце Дашкевіча любымі спосабамі, інакш ён не выжыве», — пра гэта заявіў Андрэй Саннікаў 27 верасня на сустрэчы са сваім адвакатам у следчым ізалятары Магілёва, паведаміла сёння на прэс-канферэнці ў Мінску жонка Саннікава Ірына Халіп..

Кандыдат у прэзідэнты Беларусі на выбарах 2010 года Андрэй Саннікаў і лідар зарэгістраванай у Чэхіі міжнароднай арганізацыі «Малады фронт» Зміцер Дашкевіч

сустракаліся 20 верасня ў віцебскім перасыльным пункце і ўтрымліваліся ў адной камеры.

Як раней паведамлялася, на мінулым тыдні Дашкевіча перавялі ў папраўчую калонію горада Глыбокае (Віцебская вобласць), якая лічыцца адным з самых суровых месцаў зняволення ў Беларусі. Пра факты збівання і парушэння правоў зняволеных у гэтай калоніі паведаміў 1 жніўня на прэс-канферэнцыі ў Мінску Юрый Лінга, які нядаўна вызваліўся адтуль. Яго словы пацвердзілі маці двух іншых зняволеных, якія ўтрымліваюцца ў калоніі Глыбокага. У МУС гэту інфармацыю абверглі.

Паводле інфармацыі, якую атрымала Халіп,

Зміцер Дашкевіч знаходзіцца ў дрэнным стане: ён моцна схуднеў, але галадоўку, абвешчаную 13 верасня, cпыніў.

Андрэй Саннікаў пакінуў яму свае прадукты харчавання.

Яшчэ адна ўдзельніца сённяшняй прэс-канферэнцыі, праваабаронца Алена Танкачова, дадала: аб пагрозе бяспецы Дашкевіча стала вядома з некалькіх крыніц, аднак казаць пра іх яна не стала.

«Мы маем інфармацыю, якая сведчыць аб тым, што існуе сур’ёзная пагроза асабістай бяспекі і, магчыма, жыцця Змітра Дашкевіча»,

Праваабаронца звярнулася да прадстаўнікоў дыпламатычных місій з просьбай на працягу сённяшняга дня распачаць дзеянні, каб патрапіць да Дашкевіча і даведацца адносна яго стану здароўя і ўмоў знаходжання.

Яна таксама нагадала, што ўжо два тыдні няма ніякіх вестак пра экс-кандыдата на пасаду прэзідэнта Мікалая Статкевіча, які адбывае пакаранне ў папраўчай калоніі ў Шклове.

***

Зміцер Дашкевіч разам з актывістам «Маладога фронту» Эдуардам Лобавым быў затрыманы ў Мінску за дзень да прэзідэнцкіх выбараў, 18 снежня 2010 года. Гэта затрыманне прадстаўнікі апазіцыі і праваабаронцы расцанілі як прэвентыўную меру міліцыі напярэдадні выбараў. Маладыя людзі былі прызнаныя вінаватымі ў збіванні двух мінчан. 24 сакавіка суд прыгаварыў Дашкевіча да двух гадоў пазбаўлення волі ў калоніі агульнага рэжыму. 10 верасня Дашкевічу прапаноўвалі напісаць прашэнне аб памілаванні, але ён адмовіўся.

***

Змітру Дашкевічу можна напісаць, каб падтрымаць яго, можна на наступны адрас:

Выпраўленчая калонія №13

211791, Віцебская вобласць, г. Глыбокае, вул. Савецкая, 205

Дашкевічу Дзмітрыю Вячаслававічу.

Можна таксама патэлефанаваць з гарадскога тэлефона на нумар 166 і прадыктаваць тэкст тэлеграмы.

• 0
• 0
• 0
• 0
• 0
• 0
• 0
• 0