Імпартны абутак моцна падаражае 10

Канцэрн «Беллегпрам» падаў у Камісію Мытнага саюза ініцыятыўную прапанову аб увядзенні стаўкі ўвазной мытнай пошліны на асобны імпартны абутак у памеры 20%, але не менш як 2,7 еўра за пару.

Як паведамілі БелаПАН у прэс-службе канцэрна, прапанаваная пошліна адпавядае ўзроўню тарыфнай абароны, якая дзейнічала ў Беларусі да ўступлення ў Мытны саюз. Пасля ўступлення мытная пошліна на ўвазны абутак у Беларусі была ўніфікавана да ўзроўню расійскай — 10%.

Каментуючы ініцыятыву, начальнік упраўлення каардынацыі і развіцця гарбарна-абутковай галіны «Беллегпрама» Вячаслаў Мірусін паведаміў, што з пачатку года імпарт па 11 пазіцыях абутку з верхам з натуральнай скуры павялічыўся ад паўтары да дзесяці разоў. «Пры гэтым практычна па ўсёй наменклатуры сярэднія цэны імпарту ніжэйшыя за сярэднярынкавыя цэны на айчынным рынку», — адзначыў ён.

Паводле слоў Мірусіна,

нягледзячы на павышэнне мытнай пошліны з 10 да 20%, значнага павелічэння кошту імпартнага абутку не прагназуецца.

«Паводле папярэдняй ацэнкі, кошт айчыннага абутку і імпартнага выраўнуецца. Мяркуецца, што тыя, хто купляў танны імпартны абутак з нізкімі спажывецкімі ўласцівасцямі, адмовяцца на карысць якаснага беларускага», — растлумачыў прадстаўнік «Беллегпрама», падкрэсліўшы, што «цэны не пошліна, а рынак».

Намеснік старшыні канцэрна Людміла Цяглова лічыць, што прапанаваная мера «не з’яўляецца забароннай ці абмежавальнай — яна падтрымлівае айчынных вытворцаў, паставіўшы іх з імпарцёрамі ў роўныя ўмовы на рынку». Паводле ацэнкі спецыялістаў, «гэта мера дазволіць на 5% пераразмеркаваць даходы пастаўшчыкоў імпартнага абутку на карысць бюджэту краін Мытнага саюза», дадала Цяглова.

У канцэрне падкрэсліваюць: рэалізацыя мерапрыемстваў па павелічэнні ставак увазных мытных пошлін не патрабуе затрат з бюджэту і не распаўсюджваецца на рух гэтага тавару ў межах Мытнага саюза, а дзейнічае толькі ў дачыненні да трэціх краін.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ