Гей-прайд прайшоў у мінскім рабочым раёне Шабаны + відэа 33
У шэсці ўзялі удзел каля 15 чалавек.
16.55. Дэманстранты віталі сцяг апладысментамі і аб'явілі пра завяршэнне акцыі. Удзельнікі разыходзяцца.
16.52. Актывісты запусцілі 20-метровы вясёлкавы сцяг у неба на балёніках .
16.50. Шэсце працягваецца. Сітуацыя спакойная. «Я лічу, што праводзіць прайд на ўскраіне горада не сорамна», — каментуе Сяргей Андросенка.
16.40. Каля 15 прадстаўнікоў ЛГБТ-супольнасці рушаць шэсцем па вуліцы Сяліцкага ў Мінску. Гэта рабочы раён Шабаны, каля завода жалезабетонных вырабаў. Сярод удзельнікаў госці з Украіны, Швецыі, а таксама актрыса «Свабоднага тэатра» Юлія Шаўчук.
* * *
Сёння, а 14-й гадзіны прадстаўнікі беларускай ЛГБТ-супольнасці меркавалі правесці ў Мінску гей-прайд. Ці ўдасца ім рэалізаваць свае планы?
Сачыце за абнаўленнямі на nn.by ў найбліжэйшы час.
* * *
Нагадаем, Мінгарвыканкам не дазволіў шэсце Мінскага гей-прайда, які меркавалася правесці па вуліцы Акадэміка Красіна ў мікрараёне Сосны.
Заяўнікі Мінскага гей-прайда атрымалі адпаведны адказ з Мінгарвыканкама, падпісаны галоўным ідэолагам сталіцы, — намеснікам старшыні Мінгарвыканкама Ігарам Карпенкам.
Нягледзячы на тое, што заяўлены маршрут шэсця пралягаў далёка ад цэнтра ў малалюдным месцы, гарадскія ўлады палічылі, што публічную акцыю ЛГБТ-супольнасці варта забараніць, бо правядзенне мерапрыемства планавалася на адлегласці меншай за 50 метраў ад тэрыторыі арганізацый, якія забяспечваюць жыццядзейнасць насельніцтва.
Акрамя таго, у выканкаме палічылі, што правядзенне ўказанага шэсця будзе ствараць перашкоды руху пешаходаў і нават руху транспарта, паведамляе ў сваім прэс-рэлізе нa gaybelarus.by.
«Я разглядаю забарону шэсця Мінскага гей-прайда дыскрымінацыйнай і рэпрэсіўнай», — заявіў старшыня аргкамітэта гей-прайда Сяргей Андросенка.
