На незвычайную знаходку прыйшлі паглядзець многія жыхары.
Маладога звярка чакае незайздросны лёс.
Лісяня трапіла ў тэхнічны падвал жылога дома па вуліцы Войкава праз тунэль з цеплавымі камунікацыямі, выкапаны працоўнымі «Баранавічыкамунцепласетка» паведамляе, Intex-press. Па іх словах, звярок хутчэй за ўсё ўночы ўваліўся ў выкапаную перад самым домам яму і па пракладзеных трубах трапіў у падвал.
Працоўныя заўважылі лісяня яшчэ ўчора ўвечары, але адразу не прыдумалі, што з ім рабіць. Сёння трое чалавек злавілі звярка, звязаўшы яму лапы і пысу, каб не кусаўся. Па іх словах, ліса паводзіла сябе адэкватна, нікога не пакусала, але выглядала моцна напалоханай.
На ляснога жыхара сыходзіліся паглядзець людзі з навакольных дамоў.
Пазней лісяня забраў супрацоўнік Баранавіцкай гарадской ветэрынарнай станцыі. Звярка пасадзілі ў клетку, паклалі яму піць і есці, ад чаго ён, праўда, адмовіўся.
Цяпер, каб высветліць здаровы гэта звер ці хворы на шаленства, за ім цягам 10 дзён будуць назіраць ветэрынары.
Аднак, як распавялі Intex-press на ветэрынарнай станцыі, у кожным выпадку гэтага маладога звярка чакае незайздросны лёс. Паколькі лісы з’яўляюцца патэнцыйнымі носьбітамі віруса шаленства і лічацца шкодным відам, злоўленае ў Баранавічах лісяня ўсыпяць.
