КДБ вярнуў Лябедзьку пашпарт

КДБ вярнуў лідару АГП Анатолю Лябедзьку пашпарт і некаторыя з канфіскаваных раней рэчаў. Аднак носьбіты інфармацыі, запісныя кніжкі і турэмныя нататкі, па-ранейшаму застаюцца ў сховішчах спецслужбы.

«А 9-й гадзіне я быў ўжо ў КДБ, — распавёў Анатоль Лябедзька. Прыйшоў следчы з відэааператарам і перадаў мне пад распіску пашпарт, камп’ютар, крыжык — усяго 5 пазіцый. Яшчэ 8 рэчаў не вярнулі. Гэта грашовыя сродкі і сшыткі, якія ў мяне адабралі ў СІЗА КДБ, а таксама носьбіты інфармацыі, запісныя кніжкі, якія забралі з кватэры.

(…) Як бы паміж іншым, следчы сказаў, што сшыткі, якія былі канфіскаваныя у мяне ў СІЗА КДБ, маглі быць знішчаныя. Гэта проста вар’яцтва! Хутчэй за ўсё, гэта версія з’явілася невыпадкова. Бо там і запісы, і падрыхтоўка да судовага працэсу, мае назіранні, вершы і апавяданні, якія я напісаў. І для мяне гэта адно з найбольш істотных».

***

Анатоль Лябедзька быў арыштаваны ў ноч на 20 снежня 2010 г. і ўтрымліваўся ў СІЗА КДБ да 7 красавіка 2011 г., калі быў выпушчаны пад падпіску аб нявыездзе. Выязджаў за мяжу па старым пашпарце.

Паводле ucpb.org

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ