Лідары ЕС узгаднілі бюджэтныя правілы малым складам

Лідары еўразоны ўзгаднілі бюджэтныя правілы для краін валютнага блока ў пятніцу, хоць ім і не ўдалося дамагчыся змен у дамове ЕС для ўсіх 27 краін-удзельнікаў.

Пасля 10 гадзін начных перамоваў лідары ЕС узгаднілі праграму правіл, якія абмяжоўваюць памеры дэфіцыту бюджэту і аб’ёму дзярждоўгу краін, якія ўваходзяць у еўразону.

Кіраўнік Еўрапейскага цэнтральнага банка Марыа Драгі назваў гэтае рашэнне крокам наперад, а еўразона, па яго словах, павінна стаць толькі мацнейшай пасля двух гадоў рынкавых узрушэнняў.

Прыйсці да пагаднення ўсіх 27 краін ЕС перашкодзіла патрабаванне прэм’ер-міністра Вялікабрытаніі Дэвіда Кэмерана пра саступкі, на якія ні Германія, ні Францыя пайсці былі не гатовыя, паведаміў адзін з чыноўнікаў ЕС на ўмовах ананімнасці.

Па словах трох крыніц у ЕС, любая дамоўленасць аб бюджэтных правілах з гэтага часу будзе, верагодна, закранаць толькі 17 краін валютнага блока і тых, хто захоча да іх далучыцца.

У той жа час усім лідарам Еўрасаюза ўсё ж удалося прыйсці да пагаднення аб верхняй мяжы фонду выратавання ESM — яна будзе абмежаваная 500 мільярдамі еўра. Пры гэтым, па словах крыніц, сума будзе перагледжаная ў ліпені наступнага года, калі фонд павінен будзе пачаць функцыянаваць.

Лідары таксама дамовіліся вывучыць пытанне аб прадстаўленні двухбаковых крэдытаў Міжнароднага валютнага фонду на суму 200 мільярдаў еўра, з якіх 150 млрд дадуць дзяржавы зоны еўра, каб МВФ меў больш рэсурсаў для барацьбы з даўгавым крызісам Еўропы.

afn.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ