Паўночнакарэйская газета «Нардон сінмун», цэнтральны друкаваны орган Працоўнай партыі, упершыню назвала Кім Чэн Ына вярхоўным галоўнакамандуючым Карэйскай народнай арміі.
На думку аналітыкаў, гэта з’яўляецца дэманстрацыяй паўнавартаснага пераходу ўлады ў яго рукі, бо войска заўсёды было асноўнай падпорай дынастыі Кімаў. У сярэдзіне тыдня паведамлялася, што ў Паўночнай Карэі будзе калектыўнае кіраўніцтва: Кім Чэн Ын будзе кіраваць разам з вайскоўцамі.
Пакуль не ясна, ці выключае абвяшчэнне Кім Чэн Ына вярхоўным галоўнакамандуючым заяўлены раней прынцып калектыўнага кіраўніцтва.
Восьмы дзень у КНДР працягваюцца жалобныя мерапрыемствы, звязаныя з смерцю Кім Чэн Іра. У іх удзельнічаюць прадстаўнікі ўсіх слаёў
паўночнакарэйскага грамадства.
Тэлебачаннепа-ранейшаму дэманструе сцэны праяваў масавай жалобы, якая мяжуе з істэрыяй.
Карэйскія СМІ пераконваюць людзей, што Кім Чэн Ын валодае выдатнымі здольнасцямі і годна працягне справу свайго бацькі. Адно з указанняў Кім Чэн Іра ён ужо выканаў.
Па дадзеных мясцовай прэсы, напярэдадні свайго скону кіраўнік краіны вырашыў адправіць жыхарам Пхеньяна буйную партыю рыбы. Кім Чэн Ын, у сваю чаргу, нягледзячы на глыбокі смутак у перыяд жалобы, прыняў усе неабходныя меры, і ўжо ў чацвер яна з’явілася на прылаўках сталічных магазінаў.
