Як паведаміла жонка Бяляцкага Наталля Пінчук, 757 млн 526 тыс. 717 рублёў яна пералічыла 18 студзеня са свайго рахунку на рахунак суда Першамайскага раёна Мінска.
«Гэта ўся сума, якую па пастанове суда павінен заплаціць Бяляцкі», — сказала яна.
Жонка асуджанага праваабаронцы ўстрымалася ад прагнозаў з нагоды таго, як пагашэнне шкоды можа паўплываць на вынік разгляду касацыйнай скаргі Бяляцкага.
Нагадаем,
разгляд скаргі ў Мінскім гарадскім судзе прызначаны на 24 студзеня.
Падставай для крымінальнага пераследу Бяляцкага стала інфармацыя аб яго замежных банкаўскіх рахунках, перададзеная ў Мінск чыноўнікамі Літвы і Польшчы ў рамках двухбаковых пагадненняў аб прававой дапамозе. Як патлумачыў у судзе Бяляцкі,
грошы, якія паступалі на яго рахунак, выкарыстоўваліся ў якасці дапамогі для грамадзян Беларусі, чые правы былі парушаныя. Банкаўскія рахункі былі адчыненыя за мяжой, бо беларускія ўлады неаднаразова адмаўлялі праваабаронцам у рэгістрацыі іх арганізацыі.
Паводле прысуду, Бяляцкі павінен выплаціць дзяржаве 757 млн. 526 тыс. 717 рублёў (каля 90 тыс. даляраў) нібыта для кампенсацыі шкоды, нанесенай нявыплатай падаткаў.
Збор сродкаў для пагашэння гэтай шкоды праваабаронцы абвясцілі 15 снежня.Родныя і калегі Бяляцкага спадзяюцца, што гэта паўплывае на рашэнне Мінскага гарсуда — стане падставай для вызвалення асуджанага або як мінімум змены яму меры стрымання або змякчэння прысуду.
Алесь Бяляцкі цяпер утрымліваецца ў следчым ізалятары Жодзіна. Міжнародная дэмакратычная грамадскасць, кіраўніцтва Еўрасаюза, ЗША і шэрагу іншых краін лічаць вынесены праваабаронцу прысуд палітычна матываваным і патрабуюць ад уладаў Беларусі неадкладнага вызвалення Бяляцкага.
