Камісія па пытаннях памілавання заявы Саннікава яшчэ не разглядала 6
Пра гэта паведаміў сябра камісіі Мікалай Самасейка.
Камісія па пытаннях памілавання пры прэзідэнце Рэспублікі Беларусь прашэнне Андрэя Саннікава аб памілаванні пакуль не разглядала.
Пра гэта паведаміў сябра камісіі Мікалай Самасейка, кіраўнік камісіі палаты прадстаўнікоў па заканадаўстве і судова-прававых пытаннях.
Пра тое, што экс-кандыдат у прэзідэнты Беларусі Саннікаў напісаў такое прашэнне яшчэ 20 лістапада,
Самасейка, паводле яго слоў, даведаўся «сёння з інтэрнэту».
Дэпутат паведаміў, што пасяджэнні камісіі па памілаванні праводзяцца тры-чатыры разы на год. Апошняе адбылося каля месяца таму, калі павінна прайсці чарговае пасяджэнне, ён не ведае. Як растлумачыў Самасейка,
пасяджэнні праводзяцца «па меры назапашвання матэрыялаў», інакш «прыйшлося б засядаць кожны дзень».
«Матэрыялаў на пасяджэнні разглядаецца досыць шмат», — сказаў член камісіі па памілаванні.
Сёння на прэс-канферэнцыі ў Мінску жонка Андрэя Саннікава Ірына Халіп заявіла, што яе муж напісаў на імя Лукашэнкі прашэнне аб памілаванні яшчэ 20 лістапада мінулага года пад уздзеяннем катаванняў. Аб гэтым Саннікаў паведаміў жонцы і маці падчас кароткатэрміновага спаткання з імі ў калоніі «Віцьба-3» 24 студзеня.