Мясніковіч: Распродажу дзяржуласнасці ў Беларусі няма і не будзе 17

Ніякага распродажу дзяржуласнасці ў краіне няма і не будзе, акцыі сваіх прадпрыемстваў Беларусь будзе прадаваць толькі на выгадных умовах, заявіў сёння на пасяджэнні Савета міністраў кіраўнік урада Міхаіл Мясніковіч.

Нагадаем, пасяджэнне Саўміна прысвечана вынікам сацыяльна-эканамічнага развіцця краіны ў мінулым годзе і задачам на гэты год. На пасяджэнне запрошана вузкае кола журналістаў. Для шырокага кола прадстаўнікоў СМІ 8 лютага будзе арганізавана прэс-канферэнцыя ў Нацыянальным прэс-цэнтры. Плануецца, што ў ёй возьмуць удзел намеснік міністра эканомікі Аляксандр Ярашэнка і намеснік міністра фінансаў Максім Ермаловіч.

«Ніякага распродажу дзяржаўнай уласнасці, як падаюць гэта некаторыя гора-пісакі ў сродках масавай інфармацыі, няма і не будзе, — цытуе Мясніковіча БелТА. — Мы спакойна і паслядоўна будзем адкрываць сваю эканоміку, ствараць новыя працоўныя месцы і прыцягваць інвестараў для росту дабрабыту нашых людзей».

Найбліжэйшым часам, паведаміў прэм’ер, урад прадставіць кіраўніку дзяржавы пералік арганізацый, якія плануюцца да прыватызацыі сёлета.

Паводле слоў кіраўніка ўрада, прадпрыемствы, уключаныя ў пералік прыватызацыі, будуць прадавацца толькі на ўзаемавыгадных для Беларусі і інвестараў умовах. «Кошт актываў уключаных у гэтыя планы прадпрыемстваў павінен забяспечыць сёлета прыток у краіну не менш чым 2,5 млрд. долараў», — падкрэсліў ён.

Мясніковіч таксама адзначыў, што прыватызацыя і структурныя рэформы — «гэта штодзённая праца для ўрада». «Выконваць яе будзем без гвалту і шуму, эфектыўна, адкрыта і на прававой аснове. Не будзе пры гэтым ніякіх масавых скарачэнняў, звальненняў і іншых страхаў, якія спрабуюць некаторыя апаненты парадзіць у грамадстве. Рынак працы будзе канкурэнтным», — запэўніў прэм’ер-міністр.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ