У звароце да прэзыдэнта Ўкраіны Віктара Юшчанкі гаворыцца пра тое, што сёньня ў Беларусі ліквідатары аварыі на Чарнобыльскай атамнай станцыі фактычна пазбаўленыя льготаў у выніку зьмяненьня беларускіх законаў.
— Нармальнай практыкай стала непрызнаньне сувязі паміж захворваньнямі, на якія хварэюць ліквідатары, і фактам знаходжаньня ў зоне радыяктыўнага забруджваньня, пры гэтым ігнаруюцца аб’ектыўныя навуковыя зьвесткі, якія адназначна пацьвярджаюць наяўнасьць гэтай сувязі, — гаворыцца ў звароце. — А пералік захворваньняў, якія ў прынцыпе могуць быць прызнаныя радыяцыйнаабумоўленымі, пастаянна скарачаецца. Гэта пазбаўляе магчымасьці ліквідатараў‑інвалідаў карыстацца законнымі льготамі. Спробы адстаяць свае правы праз суд не даюць вынікаў і ў некаторых выпадках цягнуцца гадамі.
Таксама ў звароце згадваецца праблема таго, што ў Беларусі шырока распаўсюджаная практыка звароту ў гаспадарчы абарот зямель, якія забруджаныя радыёнуклідамі.
Сканчваецца зварот просьбай да В. Юшчанкі закрануць чарнобыльскае пытаньне падчас перамоваў з прэзыдэнтам Беларусі, якія пройдуць у сакавіку.
Падпісалі зварот ліквідатары аварыі на ЧАЭС Аляксандр Валчанін, Васіль Сільверст і Іван Нікітчанка.
