Міністэрства эканомікі Беларусі распрацавала плян прыватызацыі найбуйнейшых прадпрыемстваў краіны, у іх лік уваходзіць «Нафтан», Мазырскі НПЗ, ТАА «Палімір», «Белшына», «Гродна Азот», Белтэлекам і тытунёвая фабрыка «Нёман». Таксама разглядаецца варыянт продажу буйных пакетаў акцый «Крыніцы» і «Менскага заводу пеністых вінаў».
Аўтары праграмы прыватызацыі прапануюць правесьці ў 2007 годзе конкурсы па продажы буйных беларускіх прадпрыемстваў. Паводле зьвестак газэты «Ведомости», расейскія прадпрымальнікі ўжо атрымалі прапановы пра пакупку некаторых прадпрыемстваў.
Прадстаўнік Дзяржаўнага камітэту па маёмасьці Беларусі Натальля Жарнасек паведаміла, што хаця простыя продажы прадпрыемства беларускім заканадаўствам не прадугледжваецца, «у выпадку паступленьня выгадных прапановаў яны таксама будуць разглядацца».
Кіраўнік Нацбанку Беларусі Пятро Пракаповіч паведаміў таксама, што найбліжэйшым часам рыхтуецца пакет дакумэнтаў па продажы Белзьнешэканамбанку.
Аналітык «Тройкі Дыялёг» Валер Несьцераў расказаў у інтэрвію газэце, якім будзе прыкладны кошт беларускіх прадпрыемстваў: дзяржпакет акцыяў (42,7%) Мазырскага НПЗ можа пры спрыяльных умовах быць прададзены за 800 мільёнаў даляраў, дзяржпакет акцыяў «Нафтану» (99,8%) — за 1,6 млрд даляраў.
У той жа час, паводле меркаваньня аналітыкаў, прэзыдэнт Беларусі не прадасьць цалкам буйныя прадпрыемствы, якія выконваюць сацыяльную функцыю. Да іх адносяцца МАЗ, МТЗ ды іншыя.
У ілюстрацыі выкарыстаны фрагмэнт настольнай гульні «Манаполія»
