Здаецца, пад 19.03 улады нэўтралізавалі ўсе крынiцы дэстабiлiзацыi: экзытпольшчыкаў, назiральнiкаў, дэмакратаў у выбарчых камiсiях. Аднак ёсьць яшчэ сейбіты хаосу, якiм нават апошнія папраўкi да КК па барабане. Гэта грыпозныя птушкi, якiя ляцяць з поўдня. Фэльетон Лёліка Ушкіна.
У дырэкцыю БТ i АНТ
Сцэнарная замова на фiльм «Пралятаючы над гняздом бусьлiка».
Абгрунтаваньне: травеньская гiстэрыя наконт «выбуху на Чарнобылі», які быццам меў месца, засьведчыла:
А) людзi дэ факта не давяраюць афіцыйным мэдыям. Усе iх спробы заспакоiць выклiкалi яшчэ большае падазрэньне, што ўлады, як i ў красавiку 1986 г., хаваюць праўду;
Б) насельнiцтва здольна стварыць трафiк антыўрадавай iнфармацыi праз Інтэрнэт, чуткi, SMS i г.д.
Выснова: у вынiку прыходу птушынага грыпу (ПГ) сытуацыя можа паўтарыцца, што паставiць пад пагрозу сцэнар апэрацыi «Элегантная перамога». Прычым, нават калi ня будзе зафiксаваны нiводны выпадак ПГ, усё роўна ашалелая ад ажыятажу ў расейскіх СМI нейкая бабка з доўгім языком зьвяжа сваю прастуду з тым, што ўчора зьела яечню.
Уладам у такой сытуацыi лягiчна не паўтараць памылак, а прыпiсаць сродкамi прапаганды, кшталту дакумэнтальных фiльмаў, пошасьць ПГ апазыцыі.
Рабочы сцэнар фiльму.
Палёт бусла. Голас за кадрам: «Iншая назва Беларусi — краiна пад белымi крыламi. Магчыма, невыпадкова цынiчныя ворагi вырашылi сарваць пляны ўсебеларускага сходу крыламi i лапкамi яе спрадвечнага сымбалю».
Трывожная музыка.
Сцэна: марш нацыстаў. Голас за кадрам: «Услухайцеся, што яны скандуюць — «хай грып! хай грып!». Яшчэ тады ворагi славянства не хавалi сваiх плянаў, i натуральна, дапамагалi iм у гэтым нацыяналісты — продкi сучасных апазыцыянэраў».
Трывожная музыка.
Сцэна: сьпiна. З-за яе голас: «я — дворнiчыха ў парку Горкага, неяк да мяне падышоў iншаземец i за грошы прапанаваў пакармiць качак у Сьвiслачы нейкiмi крошкамi. Я вырашыла, што гэта чокнуты натуралiст. На наступным рандэву дыплямат сазнаўся, што працуе на польскую дыфэнзыву, i прапанаваў разьвесьці тыя грыпозныя крошкi па сталiчных сьметнiках, дзе шмат груганоў. Я — патрыётка, натуральна, усё распавяла КДБ».
Трывожная музыка.
Сцэна: машына, што заяжджае ў браму пасольства Чэхii. Супрацоўнiкi пасольства нешта выгружаюць.
Голас за кадрам: «Думаеце, яны выгружаюць піцу? Не, у гэтых каробках сойкi, якiм прышчапілі хваробу ў сакрэтных лябараторыях ЦРУ».
Сцэна: сойка. Аб’ектыў iдзе на колца, што на яе лапцы. Надпiс на колцы: «infected in the USA».
Выступ прадстаўнiка МЗС аб дэпартацыi ўсiх чэскiх соек як парушальнікаў дыпляматычнага статусу.
Аптымiстычная музыка. Краявіды.
Голас за кадрам: «Цяпер вы ведаеце, адкуль у Беларусь трапіў сьмертаносны вірус, аднак ведаеце таксама, што трэба рабіць — ісьці і галасаваць...
Кадар «За Беларусь!».
Канец.
Сцэнарыст Л.Ушкiн.
