Сёння ў Мінгарвыканкам будзе пададзеная заява аб правядзенні вулічнай акцыі 25 Сакавіка. Яе падпісантамі сталі старшыня Рады Уладзімір Колас, мастак Аляксей Марачкін і палітык Віктар Івашкевіч.
Заяўнікі просяць дазволіць шэсце 25 Сакавіка ад 13:30 (Акадэмія навук) да 14:30 (плошча Бангалор). У выпадку адмовы арганізатары не агучваюць свой альтэрнатыўны план.Прапануецца прыцягнуць да мітынга бардаў, мастакоў, паэтаў. Івашкевіч успомніў маскоўскія пратэсты, якія адбываюцца крэатыўна, не толькі дзякуючы арганізатарам, але і ўдзельнікам. «Зрабі кожны сабе свята да 25 Сакавіка», — адзначыў ён.
«Угодкі БНР — вельмі важная падзея. На жаль, не ўсе беларусы ўяўляюць значэнне гэтага дня», — сказаў старшыня аргкамітэта Уладзімір Колас. Ён таксама адзначыў: «Задаволены тым, што апазіцыйныя сілы знайшлі ў гэтым пытанні адзінае меркаванне».
З вуснаў Коласа прагучала прапанова аб Круглым стале да тэмы ўгодак 25 Сакавіка, а таксама ажыццяўлення ідэалаў БНР у сённяшніх умовах. Да працы стала будуць запрошаныя і прадстаўнікі ўладаў. Але неабходнай умовай для гэтага называецца вызваленне палітвязняў.«Памылкі мінулых аргкамітэтаў будуць улічвацца», — сказаў Колас, калі ў яго запыталіся пра пастаяннае канфіскаванне тэхнікі падчас вулічных акцый.
Віктар Івашкевіч мяркуе, што 25 Сакавіка трэба засяроджвацца не толькі на гістарычных падзеях, але і на актуальных сёння, як захаванне незалежнасці. Івашкевіч акцэнтаваў увагу на некаторых сацыяльных момантах — падзенні заробкаў у краіне. Чарговы раз з ягоных вуснаў прагучала ідэя пра байкот парламенцкіх выбараў.
«На вуліцы павінна выйсці столькі людзей, каб дыктатар, беларусы і міжнародная супольнасць пабачыла, што «Жыве Беларусь», — зазначыў Івашкевіч. — Святкаваць сёння няма чаго, можам толькі адзначаць мужнасць тых людзей».
Аляксей Марачкін адзначыў, што будуць адбывацца не толькі вулічныя акцыі, але і выставы да гадавіны БНР.
Ігар Лялькоў з БНФ таксама выказаў задавальненне тым, што для адзначэння Дня Волі з’ядналіся апазіцыйныя сілы. Упершыню да аргкамітэта па святкаванні далучылася партыя «Справядлівы свет».«Мы не хацелі б бачыць на акцыі правакатараў у форме ці без формы», — адзначыў Івашкевіч.
