У Мінску будуць створаныя сацыяльныя аптэкі і сацыяльныя пральні 1

Сацыяльныя аптэкі і пральні плануецца адкрыць у Мінску пры тэрытарыяльных цэнтрах сацыяльнага абслугоўвання насельніцтва.

Аб гэтым паведаміла сёння на аператыўнай нарадзе ў гарвыканкаме старшыня камітэта па працы, занятасці і сацыяльнай абароне Мінгарвыканкама Жанна Рамановіч.

Як чакаецца, такія віды сацыяльных паслуг будуць аказвацца мінчанам з другога паўгоддзя.

Першапраходцам стане тэрытарыяльны цэнтр Маскоўскага раёна.

Таксама ў сталіцы на базе дамоў-інтэрнатаў будуць адкрывацца пакоі сацыяльнай перадышкі. Яны на платнай аснове могуць даць магчымасць сем’ям, якія выхоўваюць дзяцей-інвалідаў ва ўзросце да 18 гадоў, кароткатэрмінова (да месяца) змясціць дзіця-інваліда ў стацыянарную сацыяльную ўстанову. Такая паслуга дасць магчымасць бацькам адпачыць, падлячыцца, зрабіць рамонт, вырашыць іншыя праблемы паўсядзённага жыцця.

Плануецца ўкараніць новыя формы работы і з пажылымі людзьмі. У планах — адкрыццё аддзялення дзённага знаходжання для гэтай катэгорыі грамадзян, а таксама стварэнне прыёмных сем’яў для старых. Атрымае далейшае развіццё валанцёрскі рух «Пажылыя — старым», у якім ужо задзейнічаны амаль 200 валанцёраў, на абслугоўванні якіх знаходзіцца 490 грамадзян.

***

Усяго ў Мінску налічваецца каля 19 тыс. адзінокіх і амаль 35 тыс. адзінока пражываючых грамадзян. У сталіцы прынята праграма развіцця сацыяльнага абслугоўвання насельніцтва на 2011–2015 гады. Фінансаванне мерапрыемстваў гэтай праграмы ў бягучым годзе прадугледжана ў аб’ёме больш як Br110 млрд. Мерамі сацыяльнай падтрымкі ахоплены цяпер больш як 186 тыс. чалавек.

БелТА

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ