За наведванне паліклінікі прапануюць увесці сімвалічную плату 5 тыс. рублёў

Ні для каго не сакрэт, што ў нашых паліклініках і бальніцах не хапае медыцынскага персаналу. Нядаўна на выніковай калегіі Міністэрства аховы здароўя намеснік прэм’ер-міністра Анатоль Тозік таксама звярнуў на гэта ўвагу, піша «Комсомольская правда в Белоруссіі».

— Вы кажаце, што трэба нешта рабіць з чэргамі ў паліклініках.

У сярэднім на аднаго жыхара ў нас выпадае больш чым 13 наведванняў паліклінік у год, а ў суседніх краінах зусім іншая статыстыка — 6 або 6,5 наведвання на аднаго жыхара…

Давайце ўвядзем плату ў памеры 5 тысяч рублёў за наведванне паліклінікі. Нават калі памножыць 5 тысяч рублёў на сярэдні паказчык па колькасці наведванняў, то за год выйдзе невялікая сума. Затое кагосьці нават такая сімвалічная плата, магчыма, прымусіць задумацца: а ці на самай справе трэба звяртацца ў паліклініку? — цытуе Анатоля Тозіка газета «Звязда».

Па дадзеных Міністэрства аховы здароўя, у 2011 годзе ў медустановы прыйшлі працаваць больш за дзве тысячы выпускнікоў. У гэтым годзе выпускнікоў-медыкаў будзе больш — 2520 чалавек, а ў наступным і ў 2014-м — па 3,2 тысячы. На думку міністра аховы здароўя Васіля Жарко, гэта дазволіць пазбавіцца кадравага дэфіцыту. Цяпер у гарадах Беларусі, па дадзеных службаў занятасці, не хапае 948 лекараў і 1046 медсясцёр, у вёсцы — 44 і 79 спецыялістаў адпаведна.

У год наведваюць паліклініку:

— Жыхар Беларусі — 13,2 разу;

— Жыхар Еўрасаюза — 6,2 разу;

— Жыхар СНД — 8,6 разу.