Рээкспарт аўтамабіляў у 2011 годзе склаў больш за 1 млрд. долараў, паведаміў 7 сакавіка на брыфінгу ў Мінску начальнік галоўнага ўпраўлення знешнеэканамічнай палітыкі Мінэканомікі Раман Бродаў.
Паводле яго слоў, летась шэраг новых фактараў аказалі ўплыў на прыток/адток валюты ў краіну і ў цэлым на знешнегандлёвы баланс. Адным з такіх фактараў стаў масавы ўвоз аўтамабіляў і іх рээкспарт. "Так, рээкспарт мы ацэньваем у суму звыш 1 млрд. долараў", — падкрэсліў Бродаў.
Разам з тым ён звярнуў увагу, што асноўны адток валюты, звязаны з імпартам аўтамабіляў, прыпаў на першае паўгоддзе. Прадстаўнік Мінэканомікі зазначыў, што ў кароткі прамежак часу, прыкладна на працягу чатырох месяцаў, на гэтыя мэты было выдзелена "звыш 2 млрд. долараў".
Пры гэтым рээкспарт аўтамабіляў ссунуўся к канцу года.
"Таму разрыў паміж прытокам і адтокам валюты быў вельмі значным фактарам, які аказаў націск на валютны рынак", — падкрэсліў Бродаў.
Сярод іншых фактараў, якія аказалі значны ўплыў на валютны рынак і знешнегандлёвы баланс, ён назваў вываз спажывецкіх тавараў, прадуктаў харчавання, аўтамабільнага паліва грамадзянамі іншых дзяржаў.
"Гэта таксама паўплывала на прыток валюты ў краіну і знайшло адлюстраванне ў плацежным балансе", — зазначыў Бродаў. Ён дадаў, што Мінэканомікі не бачыць праблем з прытокам валюты ў краіну сёлета.
Закранаючы вынікі мінулага года, Бродаў нагадаў, што сальда знешняга гандлю ў 2011 годзе склала 1,6 млрд. долараў, што ў 4,5 разу больш, чым у 2010 годзе. "І гэта лепшае значэнне за апошнія шэсць гадоў. Нават з улікам таго, што Беларусь плаціла пошліну за экспартаваныя за межы Мытнага саюза нафтапрадукты, знешнегандлёвы баланс лепшы за паказчык 2010 года ў два разы", — канстатаваў прадстаўнік Мінэканомікі.
Дэфіцыт знешняга гандлю складае 3% ад ВУП, і гэта значэнне, падкрэсліў Бродаў, "знаходзіцца ў зоне эканамічнай бяспекі".
Ён таксама нагадаў, што экспарт у 2011 годзе ўзрос на 56%, а імпарт на 29%. Пры гэтым апярэджанне тэмпаў росту экспарту над тэмпамі росту імпарту на 27% з'яўляецца рэкордным для Беларусі.
Рэкордным з'яўляецца і прырост экспарту ў коштавым выражэнні, які склаў 46,6 млрд. долараў. "Гэта на 26% вышай за ўзровень 2008 года, які лічыцца самым камерцыйна паспяховым як для Беларусі, так і для сусветнай эканомікі", — падкрэсліў Бродаў.
Ён зазначыў, што гэты рост быў дасягнуты не з-за росту цэн на экспартаваную прадукцыю і імпартаванай інфляцыі, а ў многім за кошт павелічэння фізічных аб'ёмаў экспарту.
