Жонка прэзідэнта Расіі Святлана Мядзведзева прыбыла на адпачынак у Італію, каб правесці амаль тыдзень у знакамітым пяцізоркавым SPA-курорце Grand Hotel La Pace ў Монтекатіні Тэрме, што ў Таскане. Пра гэта паведамляе NEWSru.com са спасылкай на італьянскае агенцтва ANSA.
Цёплы клімат Тасканы і культурная спадчына рэгіёну вабяць турыстаў з усяго свету. Але мала хто з іх здольны дазволіць сабе такі размах, як жонка расійскага прэзідэнта.
«У нашай ціхай мясцовасці перапалох. Учора за кіламетр ад мяне ў пяцізоркавую гасцініцу Grand Hotel La Pace ў Монтэкаціні-Тэрмэ ў суправаджэнні 30 чалавек аховы заехала Святлана Уладзіміраўна Мядзведзева», -- піша ў сваім блогу расійскі журналіст Андрэй Мальгін, які жыве ў Італіі. Паводле мясцовай прэсы, Мядзведзева прабудзе ў гатэлі ад 6 да 11 сакавіка.
Прыбыццё высокай госці рыхтаваў асабіста амбасадар РФ у Італіі Аляксей Мяшкоў. Ён, дадае блогер, асабіста правяраў усе дэталі будучага знаходжання Мядзведзевай. Уключаючы меню рэстарана, які таксама не будзе прымаць звычайных наведвальнікаў
Мясцовая газета Il Tirreno у сваім артыкуле «Тэрмы для першай рускай лэдзі» называе пакуль яшчэ першую лэдзі Расіі «царыцай ў тэрмах»: паводле некаторых звестак, у Монтэкаціні-Тэрмэ жонка расейскага прэзідэнта збіраецца прайсці курс лячэння тэрмальнай вадой.
Пра тое, што ў Монтэкаціні сур'ёзна разлічваюць на расейскіх турыстаў, паказвае і сайт гатэля - у яго ёсць расейская версія. І гэта ў краіне, дзе двое з трох работнікаў туріндустрыі не валодаюць (або робяць выгляд, што не валодаюць) нават ангельскай мовай, што выклікае нараканні шматлікіх расійскіх турыстаў.
Жонку расейскага прэзыдэнта чакае добры адпачынак. «Ізноў здабыць бадзёрасць і свежасць можна ў расслабляльнай атмасферы найноўшага SPA-цэнтра плошчай больш за 800 квадратных метраў, -- гаворыцца на сайце гатэля. -- Самае дасканалае майстэрства шэф-кухара нават самых патрабавальных гурманаў скорыць арыгінальнымі спосабамі прыгатавання страў тасканскай кухні».
Вядома, было б вельмі цікава даведацца, хто аплачвае адпачынак "царыцы"..
Кошт знаходжання ў прэзідэнцкіх апартаментах, у якіх, як можна выказаць здагадку, спынілася Мядзведзева, за суткі складае 600 еўра. За арэнду ўсіх нумароў, якія прымыкаюць да прэзідэнцкага сьюта, дзе будзе пражываць ахова, прыйдзецца выкласці 12 тысяч еўра за суткі. І гэта не лічачы харчавання і іншых паслуг.
Нават прэзідэнцкага заробку на гэта замала.
Гатэль пакуль замкнёны для іншых гасцей.
Мяркуецца, што ў бліжэйшыя дні Святлана Мядзведзева наведае некалькі суседніх гарадоў у Таскане.
Служба пратакола Мядзведзевай заявіла, што жонка прэзідэнта адпачывае за ўласны кошт.