МУС: Пашырэння спіса невыязных па палітычных матывах не было

Cпіс грамадзян Беларусі, якім абмежаваны выезд з краіны, не пашыраўся, заявіў намеснік начальніка дэпартамента па грамадзянстве і міграцыі МУС Юрый Лянчэўскі 27 сакавіка падчас прамой тэлефоннай лініі, адказваючы на пытанне агенцтва Інтэрфакс-Захад.

«Законам пра ўезд-выезд ўсе падставы выразна прапісаны, выразна прапісана, каму можа быць абмежаваны выезд. Ніякага пашырэння ў сувязі з новымі палітычнымі і іншымі матывамі не было», — сказаў ён.

Лянчэўскі таксама заявіў, што паведамленні грамадзянам, якім забаронены выезд з краіны, не накіроўваюцца. «Грамадзяне маюць права звярнуцца ў нашы падраздзяленні. На дзень звароту яму могуць даць даведку, ёсць на яго інфармацыя ў базе даных ці не. Але гэта не з’яўляецца індульгенцыяй, каб перасекчы мяжу. Пакуль чалавек дасягае мяжы, звесткі могуць паступіць, а пагранічнікі кіруюцца выключна электронным банкам даных, а не даведкамі», — растлумачыў чыноўнік дэпартамента.

Адказваючы на пытанне, ці магчыма памылковае ўнясенне ў банк даных, напрыклад, 40-гадовых грамадзян, якія нібыта ўхіляюцца ад прызыву, Лянчэўскі прызнаў: «бывае чалавечы фактар, калі памылкова ўнеслі звесткі». «Непрыемна, вядома, людзі нясуць маральны і матэрыяльны ўрон. Гэта індывідуальныя выпадкі, досыць рэдкія. Мы разбіраемся па кожным канкрэтным выпадку», — запэўніў намеснік начальніка дэпартамента.

Нагадаем, з пачатку сакавіка адмову ў выездзе за мяжу атрымалі апазіцыйныя палітыкі Анатоль Лябедзька, Віктар Карняенка, Сяргей Калякін, Валерый Ухналёў, Вінцук Вячорка, Лёў Марголін і Станіслаў Шушкевіч, праваабаронцы Валянцін Стэфановіч, Алег Гулак, Гары Паганяйла, Алег Волчак і Андрэй Бандарэнка, журналісты Жанна Літвіна, Міхаіл Янчук і Андрэй Дынько.

Ва ўпраўленнях па грамадзянстве і міграцыі па месцы жыхарства ім у якасці прычын адмовы на выезд за мяжу называлі нез’яўленне ў ваенкамат з нагоды прызыву ў армію (пры тым, што прызыўны ўзрост гэтых грамадзян даўно мінуў), а таксама нейкія прад’яўленыя ім грамадзянскія іскі, пра якія самі яны нічога не ведалі.

Варта таксама адзначыць, што 1 сакавіка начальнік упраўлення па наглядзе за выкананнем заканадаўства і законнасцю прававых актаў Генпракуратуры Беларусі Павел Радзівонаў заявіў журналістам: апазіцыянерам, якія заклікаюць да санкцый у дачыненні да Беларусі, можа быць абмежаваны выезд за мяжу. 12 сакавіка той жа Радзівонаў публічна сцвярджаў: у Генпракуратуры няма інфармацыі аб уключэнні прадстаўнікоў апазіцыі ў спіс невыязных.

• 0
• 0
• 0
• 0
• 0
• 0
• 0
• 0