3 мая былы палітвязень Зміцер Бандарэнка выляцеў з Мінска ў Варшаву. Яго жонка Вольга паведаміла, што муж хоча пракансультавацца там наконт магчымага лячэння. За кратамі ён перанёс дзве аперацыі: яму выдалілі міжпазванковую грыжу і абсцэс на назе. Стан здароўя не палепшаў.
Разам з тым, Бандарэнка паўтара года не бачыўся з дачкой, якая жыве ў польскай сталіцы.
Самалёт Зміцер абраў на той выпадак, каб было недалёка вяртацца, калі б яго ўнеслі ў спісы невыязных. Але пытанняў пры праходжанні мяжы не ўзнікла.
Па словах Вольгі Бандарэнка, муж вернецца ў Беларусь дзён праз пяць.
Змітра Бандарэнку асудзілі на два гады калоніі за ўдзел у акцыі пратэсту 19 снежня 2010. Ён з'яўляўся даверанай асобай Андрэя Саннікава на мінулых прэзідэнцкіх выбарах. Прашэнне аб памілаванні палітвязень напісаў 1 лютага. 15 красавіка яго выпусцілі на свабоду. За ім ўстаноўлена «прафілактычнае назіранне». І пры выездзе за межы Мінска больш чым на месяц ён павінен папярэджваць органы ўнутраных справаў.
