23-гадовы Фарыд навучаўся на гістарычным факультэце БДУ. Як паведаміў кіраўнік прэс-службы Упраўлення Следчага камітэта па Мінску Аляксандр Герасімаў, хлопец скончыў жыццё самагубствам уначы на 11 мая.
Па словах Герасімава, малады чалавек рыхтаваўся да самагубства. Ён замкнуў дзверы ў пакой, завесіў фіранкі. Усе рэчы і адзенне расклаў па стосах.
На адным з іх была запіска, у якой Фарыд падрабязна распісаў, каму што перадаць пасля яго смерці. Астатнія ж рэчы ён наказаў аддаць у дзіцячы дом і бедным.Яшчэ ў адной запісцы было адзначана, што прычыну свайго ўчынку малады чалавек запісаў на тэлефон. Але пакуль мабільнік знаходзіцца на экспертызе і следчыя не ведаюць, што гэта за запіс і на якой мове.
Суседзі Фарыда па пакоі паведамілі следчым, што малады чалавек часта наведваў гульнявыя клубы і нярэдка прайграваў у іх грошы. І апошнім часам ён быў чымсьці засмучаны — хадзіў пануры.
Устаноўлена, што каля двух гадоў таму студэнт спрабаваў парэзаць сабе вены. Прычына — непаразуменне з дзяўчынай.
Праз нейкі час пасля таго, як стала вядома пра самагубства, да інтэрната з’ехаліся прадстаўнікі азербайджанскай дыяспары. Гэта не адзіны прыклад такой салідарнасці прадстаўнікоў гэтага народа. Пасля таго, як нядаўна на мінскай кальцавой дарозе ў аварыі загінуў азербайджанец, на месца трагедыі з’ехаліся дзясяткі яго суайчыннікаў.
Паводле дадзеных Сусветнай арганізацыі аховы здароўя, у Беларусі адзін з высокіх у свеце паказчыкаў па колькасці самагубстваў на 100 тысяч насельніцтва. У 2007 гэта лічба склала 57,5 выпадкаў. Побач з Беларуссю па гэтым паказчыку знаходзяцца толькі Расія, Казахстан, Шры-Ланка, Венгрыя.
***
Тэлефоны службы экстранай псіхалагічнай дапамогі
Кругласуткавая служба экстранай псіхалагічнай дапамогі «Тэлефон даверу»: 8 (017) 202-04-01
Рэспубліканская тэлефонная «гарачая лінія» па аказанні псіхалагічнай дапамогі непаўнагадовым, што трапілі ў крызісную сітуацыю: 8-801-100-16-11.
