Старшынства ў ЕС перайшло да Кіпра

Ад 1 ліпеня краіна стала фармальным лідарам ЕС — на бліжэйшыя паўгода.

Старшынства ва ўмовах крызісу ў еўразоне пераходзіць да дзяржавы, якая сама днямі заявіла, што гатовая пазычаць у іншых краін ЕС і ў Міжнароднага валютнага фонду. Паводле ацэнак экспертаў, Кіпру неабходна каля 10 мільярдаў еўра. Цяперашнія праблемы ў эканоміцы наўпрост звязаныя з крызісам у Грэцыі, перадае ИТАР-ТАСС.

У першым паўгоддзі сёлета абавязкі старшыні Еўрасаюза выконвала Данія.

У пачатку наступнага года Кіпр перадасць мандат Ірландыі. Адметна, што супраць старшынства Кіпра рэзка пярэчыла Турцыя, якая мае статус краіны-кандыдата на ўваходжанне ў ЕС. Турцыя — адзіная краіна свету, што прызнае самаабвешчаную Рэспубліку Паўночны Кіпр, утвораную ў 1974 годзе турэцкай грамадой выспы. Анкара паабяцала цягам паўгоддзя байкатаваць усе мерапрыемствы, арганізаваныя пад эгідай старшынства Кіпра ў ЕС. Турэцкія ўлады вінавацяць Кіпр у нежаданні весці перамовы з турэцкай грамадой.

Еўрарадыё

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ