У Калінкавіцкім раёне пройдзе Фестываль гумару «Аўцюкі-2012»

Сёмы Усебеларускі фестываль гумару «Аўцюкі-2012» пройдзе 27–28 ліпеня ў Калінкавіцкім раёне, у вёсках Вялікія і Малыя Аўцюкі.

Як паведамілі ў прэс-службе Гомельскага аблвыканкама, мерапрыемства пачнецца ў Малых Аўцюках з адкрыцця музея-сядзібы гумару. Сядзіба складаецца з двух частак: музея гісторыі Аўцюкоў і культурнай часткі, дзе будуць выступаць калектывы і працаваць выставы. Адкрываць музей будуць нетрадыцыйна — перапілоўваючы бервяно, а не разразаючы чырвоную стужку.

У Малых і Вялікіх Аўцюках пройдзе конкурс падворкаў, канцэрт, узнагароджанне пераможцаў (у ліку падарункаў — парасяты, куры і інш.), феерверк і дыскатэка.

28 ліпеня фестываль гумару працягнецца на цэнтральнай плошчы і ў парку Калінкавічаў. Выступяць прафесійныя і аматарскія калектывы, будуць працаваць гандлёвыя рады, выставы дэкаратыўна-прыкладнога мастацтва, гумарыстычных палос раённых газет, мастакоў-гумарыстаў, шаржыстаў. Адбудуцца традыцыйныя конкурсы «аўцюкоўскай юшкі», футбольны матч паміж мужчынскай і жаночай камандамі.

Усебеларускі фестываль гумару праводзіцца ў Аўцюках з 1995 года. Апошні адбыўся ў 2008 годзе.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ