У інтэрнэце запрацаваў сайт у падтрымку затрыманага журналіста Антона Сурапіна — antonsurapin.org.
На сайце можна прачытаць навіны, што датычацца Сурапіна, даведацца пра акцыі, праведзеныя ў яго падтрымку, прагледзець публікацыі, што датычацца фатографа. Таксама там размешчана сутнасць абвінавачання Сурапіна і адрасы, па якіх можна аказаць яму падтрымку.
Найбліжэйшым часам на сайце з'явіцца англамоўная версія.
Сурапін быў затрыманы КДБ 13 ліпеня па справе аб незаконным перасячэнні мяжы шведскім лёгкаматорным самалётам.Інцыдэнт адбыўся раніцай 4 ліпеня. Над Івянцом і Мінскам былі скінутыя сотні плюшавых мядзведзяў. Адказнасць за акцыю ўзялі на сябе прадстаўнікі шведскай піяр-кампаніі Studio Total. Такім чынам яны хацелі падтрымаць свабоду слова ў Беларусі.
Тым часам КДБ працягвае расследаваць крымінальную справу па факце перасячэння дзяржмяжы. Паводле неафіцыйнай інфармацыі, абвінавачанні выстаўленыя двум фігурантам.Адзін з іх — 20-гадовы студэнт Інстытута журналістыкі БДУ Антон Сурапін, які першым выклаў на сваім сайце Belarusian News Photos фотаздымкі скінутых шведамі цацачных мядзведзяў. Другі — Сяргей Башарымаў, які займаецца здачай кватэр на кароткі тэрмін і ў якога шведы — удзельнікі акцыі маглі або планавалі здымаць жыллё.
У дачыненні да Сурапіна распачата справа на падставе ч. 3 арт. 371 КК, ён абвінавачваецца ў "дапамаганні наўмыснаму незаконнаму перасячэнню мяжы, учыненаму арганізаванай групай асоб". Башарымаву нібыта ўжо выстаўлена абвінавачанне ў дапамаганні незаконнаму перасячэнню мяжы.
Ёсць таксама звесткі, што па справе затрымліваліся дзве дзяўчыны.Гэта сяброўка Башарымава Ірына Лагойка, якая суткі правяла ў СІЗА КДБ. З яе ўзята падпіска аб невыдаванні тайны следства. А таксама 16-гадовая Кацярына Скурат, якая нібыта першай сфатаграфавала плюшавых мішак і даслала фотаздымкі Сурапіну. Дзяўчыну дапыталі ў прысутнасці бацькоў і адпусцілі.
0
0
0
0
0
0
