Лідар Руху «За Свабоду» не зарэгістраваны кандыдатам у дэпутаты па Уручанскай акрузе Мінска.
«Наша Ніва»: Як Вы ацэніце рашэнне акруговай камісіі?
Аляксандр Мілінкевіч: Улада дзейнічае кіруючыся мэтазгоднасцю, а не законам. Подпісы, што мы здалі, правяралі дзве групы графолагаў з МУС. У іх не было прэтэнзій да саміх подпісаў, а толькі да таго, ці той рукой пастаўлена дата. Чапляліся як маглі. Калі б яны разумелі важнасць пакрокавага нармалізавання стасункаў з Захадам, то бачылі б неабходнасць знаходжання ў парламенце людзей з іншым меркаваннем. Я думаў, што яны ўжо да гэтага саспелі, але зусім не саспелі.
«НН»: Вялікі працэнт подпісаў забракавалі?
АМ: Спачатку правяралі 200 подпісаў. Пасля на дадатковую праверку ўзялі яшчэ 150. З гэтых 350 — 99 былі прызнаныя несапраўднымі. Але абсалютная лухта. У маёй камандзе працавалі дасведчаныя людзі, якія праводзяць не першую кампанію.
«НН»: Расстроіліся?
АМ: Ведаеце, так. Не таму, што верыў у справядлівасць. А таму, што хачу працаваць з людзьмі. Вельмі хацелася ярка правесці другую фазу кампаніі. Зрэшты, буду працаваць і без выбараў: сустракацца з людзьмі, ездзіць па краіне. Мне здавалася, што ўлады больш цвяроза ацэньваюць свае сілы. Гатовыя пайсці на нейкую эвалюцыю, гульню ў дэмакратыю, калі не хочаце. Не ідуць. Самі ж робяць сабе шкоду.
«НН»: Будзеце падаваць скаргу?
АМ: Так, канечне. Хаця не надта веру, што пазіцыя акруговай камісіі надта адрозніваецца ад пазіцыі ЦВК.
Цяпер чытаюць
«Мы кідалі камяні, каб яны не ўзляталі». Адным з тых, хто спрабаваў спыніць дроны, што выляталі з фур, быў беларус Антон27
Каментары