Аб'яднаная грамадзянская партыя (АГП) заклікае Аляксандра Лукашэнку адмяніць цэнзуру выступленняў кандыдатаў у дэпутаты і адправіць кіраўніка ЦВК Лідзію Ярмошыну "на заслужаны адпачынак". Такая сутнасць адкрытага ліста на імя кіраўніка дзяржавы, паведаміў журналістам 29 жніўня ў Мінску лідар АГП Анатоль Лябедзька.
Нагодай для ліста стала забарона на трансляцыю па тэлебачанні ролікаў кандыдатаў у дэпутаты ад АГП, якія заклікаюць да байкоту парламенцкіх выбараў.
Лябедзька падкрэсліў, што адозва адрасаваная менавіта Лукашэнку, а не ЦВК, бо, паводле яго слоў, "сцэнарыі ўсіх выбарчых кампаній пішуцца ў "Чырвоным доме".
У лісце гаворыцца аб тым, што "выбарчая кампанія яшчэ не падышла і да экватара, а ўжо захлынаецца ад скандалаў", што ў краіне сістэматычна парушаецца Канстытуцыя. "Цяперашняя выбарчая кампанія не дазваляе грамадзянам выказаць сваё волевыяўленне шляхам выбару самых годных кандыдатаў у галоўны заканадаўчы орган краіны. Прадстаўнікам АГП, напрыклад, не даюць магчымасці выступіць перад грамадзянамі ні па радыё, ні па тэлебачанні. Ім ставіцца ў віну тое, што яны прапагандуюць байкот выбараў", — пішуць аўтары.
АГП заклікае Лукашэнку ўстараніць двайныя стандарты і нагадваюць кіраўніку дзяржавы яго ж словы: "Я ні за каго не буду галасаваць, усё адно падмануць, я не пайду галасаваць".Такую заяву Лукашэнка зрабіў у тэлеэфіры 20 красавіка 1995 года.
"Чаму ж нам у 2012 годзе не дазваляюць паўтарыць гэтыя ж словы?" — пацікавіўся Анатоль Лябедзька.
АГП таксама просіць кіраўніка дзяржавы растлумачыць, чаму фраза з агітацыйных ролікаў кандыдатаў "Лукашэнка і яго сістэма — гэта тупік" трапляе пад цэнзуру."Гэта ж не абраза, а пытанне для абмеркавання, і ў нас ёсць факты, якімі мы можам яе абгрунтаваць", — падкрэсліў лідар партыі.
Ён паведаміў, што ў лісце ўтрымліваецца просьба "ўздзейнічаць на спадарыню Ярмошыну і сказаць ёй, каб яна не захаплялася жангляваннем лічбаў". "Дый наогул, было б лагічным адправіць яе на заслужаны адпачынак. Свой унёсак ва ўдасканаленне і развіццё выбарчага працэсу ў Беларусі яна зрабіла", — працытаваў Лябедзька ўрывак ліста.
АГП звярнулася да незалежных СМІ Беларусі з просьбай аказаць інфармацыйную падтрымку тым кандыдатам, чые выступленні не выпусціла ў эфір цэнзура.
Лябедзька таксама паведаміў, што сёння ў 19.00 у мінскім мікрараёне Вяснянка, каля магазіна "Суседзі", адбудзецца сустрэча прадстаўнікоў АГП з выбаршчыкамі.
