Беларусь і Ізраіль плануюць спрасціць візавы рэжым 3

У бліжэйшай будучыні будзе распрацаваны механізм спрашчэння візавага рэжыму паміж Беларуссю і Ізраілем

. Пра гэта журналістам заявіў міністр турызму Ізраіля, сустаршыня сумеснага беларуска-ізраільскага камітэта па гандлёвым і эканамічным супрацоўніцтве Стас Місежнікаў па выніках трэцяга пасяджэння гэтага камітэта, якое прайшло 4 верасня ў Мінску.

Паводле яго слоў, спрашчэнне візавага рэжыму дазволіць большай колькасці ізраільцян наведваць Беларусь. «У Ізраілі жыве прыкадна 140 тыс. былых жыхароў Беларусі, якія з задавальненнем наведаюць сваіх сяброў, сваякоў, магілы сваякоў», — адзначыў Місежнікаў. Паводле яго слоў, павялічыцца таксама паток паломнікаў з Беларусі, якія захочуць наведаць Ізраіль.

Як адзначыў Місежнікаў, гэта, у сваю чаргу, прывядзе да з’яўлення на рынку большай колькасці авіяперавозчыкаў, якія выконваюць рэйсы паміж Беларуссю і Ізраілем, і падзення цэн на авіябілеты.

«Гэта — нонсэнс: 3,5 гадзіны пералёт, а цэны завоблачныя і нязручныя рэйсы», — сказаў ён.

Намеснік прэм’ер-міністра Міхаіл Русы выказаў упэўненасць, што бліжэйшым часам будуць знойдзеныя шляхі для спрашчэння візавага рэжыму паміж краінамі. Цяпер разглядаюцца розныя варыянты вырашэння гэтага пытання.

Як адзначыў міністр турызму Ізраіля, адным з перспектыўных кірункаў супрацоўніцтва паміж Ізраілем і Беларуссю з’яўляецца развіццё аздараўленчага турызму. Гэты кірунак абмяркоўваўся на нядаўняй сустрэчы з міністрам спорту і турызму Беларусі Алегам Качаном. Ізраільцяне могуць быць зацікаўленыя ў адпачынку на беларускіх аграэкасядзібах, пансіянатах на беразе азёр. Асабліва спрыяльны перыяд для адпачынку — ліпень-жнівень, калі ў Ізраілі стаіць спякота — да 43 градусаў у цені. Беларусы, у сваю чаргу, могуць быць зацікаўленыя ў аздараўленні на Мёртвым моры, пераважна ў зімовы перыяд.

Паводле слоў намесніка прэм’ер-міністра Беларусі, таксама перспектыўным уяўляецца выкарыстанне спартыўнымі камандамі Беларусі і Ізраіля спартыўных баз адзін аднаго.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ