Інцыдэнт адбыўся ўвечары 17 верасня на вуліцы Чырвонаармейскай у Мінску, непадалёк ад будынку прэзідэнцкай адміністрацыі.
Сябра ГА «БАЖ» Мікіта Броўка расказаў, што здымаў для сайта «Новага часу» вулічнае апытанне, а потым сеў на лаўку, трымаючы камеру і мікрафон на каленях. У гэты момант да яго падышоў невядомы чалавек у цывільным, які назваўся супрацоўнікам службы бяспекі.
«Ён паводзіў сябе агрэсіўна — дакументы паказваць адмовіўся, пачаў пытацца, што мы тут здымаем, запатрабаваў нашы пасведчанні, — распавёў ГА „БАЖ“ Мікіта Броўка. — Пабачыўшы назву „Новы час“, ён заявіў, што такога выдання не існуе, парваў пасведчанне і сышоў».
Журналіст будзе раіцца з юрыстамі і рэдактарам наконт магчымых дзеянняў па абароне сваіх правоў.