Газманаў, Вера Брэжнева, Рынат Ібрагімаў — і ніякіх «чарнілаў» 3

Гасцям і удзельнікам фестывалю «Дажынкі-2012» у Горках 21–23 верасня пакажуць сваё майстэрства 3.600 артыстаў, паведаміў 18 верасня на прэс-канферэнцыі начальнік упраўлення культуры Магілёўскага аблвыканкама Анатоль Сінкавец.

Паводле слоў чыноўніка, на фестывалі прадугледжана дзесяць розных пляцовак, на якіх будуць выступаць артысты. Выступяць як творчыя аматарскія калектывы, так і вядомыя выканаўцы, у прыватнасці Алег Газманаў, Рынат Ібрагімаў, Вера Брэжнева.

Як заявіў начальнік упраўлення гандлю Магілёўскага аблвыканкама Алег Буянаў, падчас «Дажынак» пройдуць кірмашы рыбы, мёду, кандытарскіх вырабаў, піўны фестываль. Акрамя таго, жадаючыя змогуць пакатацца на трох паветраных шарах.

Буянаў адзначыў, што моцны алкаголь падчас фестывалю будзе прадавацца толькі на разліў. «Чарнілаў» прадаваць не будзем», — сказаў чыноўнік.

Паводле слоў намесніка начальніка ўпраўлення ДАІ Магілёўскага аблвыканкама Віктара Каралёва, у Горках 21–23 верасня трэба чакаць не менш як 20 тыс. транспартных сродкаў. Для іх прадугледжаны тры зоны парковак. Першая — для асабістага транспарту грамадзян, другая — для аўтамабіляў, якія абслугоўваюць аб’екты гандлю, трэцяя — для транспарту афіцыйных дэлегацый, артыстаў, прадстаўнікоў СМІ.

Што датычыцца колькасці гасцей і ўдзельнікаў, то, як адзначыў начальнік абласнога ідэалагічнага ўпраўлення Андрэй Кунцэвіч, іх будзе на парадак больш, чым на ліпеньскім свяце «Александрыя збірае сяброў» у Шклоўскім раёне, дзе было прыкладна 60 тыс. чалавек.

Для жадаючых наведаць фестываль павялічаць колькасць аўтобусаў. Мяркуецца, што ўсяго іх будзе задзейнічана прыкладна 120 з Магілёва і вобласці. Прадугледжаны і дадатковыя дызель-цягнікі, якія будуць курсіраваць ад Горак (станцыя Пагодзіна) ў бок Оршы, Магілёва і Крычава.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ