20.09.2012 / 14:42

Студэнты БНТУ: «Галасуем датэрмінова, бо так трэба»

Відэакарэспандэнткі «Нашай Нівы» апыталі студэнтаў БНТУ, якіх гуртам гоняць на датэрміновае галасаванне.

18 верасня пачалося датэрміновае галасаванне на парламенцкіх выбарах. Паводле звестак Цэнтрвыбаркама, за 2 дні «прагаласавалі» больш за 7% выбарцаў. Ніякіх парушэнняў выбарчага заканадаўства Цэнтрвыбаркам не заўважыў.

Тым часам у «Нашу Ніву» дзясяткамі звяртаюцца навучэнцы беларускіх ВНУ, якія сцвярджаюць, што вымушаныя галасаваць датэрмінова. У іншым выпадку іншагароднім пагражаюць высяленнем з інтэртату. Астатнім абяцаюць праблемы на сесіі. Затое студэнты, якія прагаласавалі датэрмінова, атрымаюць дадатковы выходны.

Вось што паведаміў студэнт БНТУ:

«Прайшла выхавацелька па пакоях і сказала, каб усе датэрмінова прагаласавалі. Тое самае і ў універы: куратар і намеснік дэкана прыходзілі «нагадваць» пра датэрміновае галасаванне,

а ў абмен — выходныя пятніца і субота. Наша гародніна бязвольная адразу ж пабегла ставіць птушачкі… Які сорам…»

Журналісты НН высвятлялі, чаму студэнты найбуйнейшай тэхнічнай ВНУ галасуюць датэрмінова:

«Даюць магчымасць пасля два дні прагуляць», — шчыра патлумачыў студэнт. «У нас чалавек дзевяць-сем прагаласавала», — шчыра прызналася супрацоўніца.

Аксана Рудовіч, Ірына Арахоўская