На гэтай акрузе дэмакратычныя актывіста ладзяць кампанію байкоту.

У сталічнай Фрунзенскай акрузе № 101 арганізатары кампаніі байкоту парламенцкіх выбараў знайшлі ўчастак, дзе прапісана выбаршчыкаў менш за колькасць кватэр. Пра гэта паведаміў кіраўнік мінскай арганізацыі руху «За Свабоду» Юрый Меляшкевіч.

Нагадаем,

кампанію байкоту ў акрузе № 101 арганізуюць прадстаўнікі руху «За Свабоду», Партыі БНФ, грамадзянскай кампаніі «Гавары праўду!» і яе маладзёжнага крыла «Zмена».

Меляшкевіч зазначыў, што маніпуляцыі ў акрузе № 101 пачаліся «з гульні са спісамі выбаршчыкаў». «У акрузе ёсць унікальны ўчастак, дзе колькасць прапісаных у ім выбаршчыкаў меншая за колькасць кватэр на ўчастку. Якога-небудзь тлумачэння адносна гэтага ў акруговай камісіі мы не атрымалі. Будзем падаваць скаргу ў ЦВК і пракуратуру», — сказаў ён.

Паводле слоў Меляшкевіча, з першых жа дзён датэрміновага галасавання здзівіла «арганізаваная актыўнасць» выбаршчыкаў.

«Нашы назіральнікі бачылі падвоз груп людзей, якія прыходзілі галасаваць. Калі наш назіральнік выйшаў на вуліцу, каб даведацца, чаму за 10 хвілін на ўчастку збіраецца чарга, ён убачыў групу людзей, з якімі нейкі чалавек у касцюме праводзіў растлумачальную гутарку.

Назіральніку сказалі, што гэта сход жыллёвага кааператыва. Пры гэтым людзі галасавалі на трох розных участках, якія размяшчаліся ў адным будынку. Яны нават тэарэтычна не могуць быць членамі аднаго кааператыва», — паведаміў прадстаўнік «За Свабоду».

БелаПАН