Работнікі ЖЭС-48 папрасілі пракуратуру праверыць законнасць вылучэння Савановіча 8

Міхаіл Савановіч, які вырашыў змяніць пасаду старшыні Мінгарсавета на мандат дэпутата палаты прадстаўнікоў нацыянальнага сходу, зноў стаў героем скандалу. Па сцвярджэннях работнікаў ЖЭС-48ЖРЭА-1 Фрунзенскага раёна сталіцы, яны зусім не вылучалі яго кандыдатуру на выбары па 104-й Кальварыйскай выбарчай акрузе сталіцы, у якой ён перамог.

Адпаведную заяву ў пракуратуру горада Мінска, як паведамляе афіцыйны сайт праваабарончага цэнтра «Вясна», падаў майстар ЖЭС-48 Павел Спірын.

Да яго далучыліся яшчэ дзевяць супрацоўнікаў арганізацыі, якія заявілі, што ніякага сходу па вылучэнні Міхаіла Савановіча ў іх арганізацыі не праводзілася, а адпаведныя дакументы існуюць толькі на паперы.

Работнікі ЖЭС лічаць, што ўсё было зроблена па камандзе кіраўніка ЖРЭА-1 Фрунзенскага раёна Васіля Шашка, у дачыненні да якога яны просяць распачаць крымінальную справу па артыкуле 192 Крымінальнага кодэкса Беларусі — «Парушэнне заканадаўства аб выбарах, рэферэндуме, аб адклiканнi дэпутата і аб рэалізацыі права заканадаўчай ініцыятывы грамадзян».

Згодна з фіктыўнымі, на думку заяўнікаў, пратаколу, 57 супрацоўнікаў ЖЭС-48 нібыта абралі дэлегатамі сходу майстра Паўла Спірына, майстра Таццяну Мароз, слесара-сантэхніка Андрэя Куцькіна і работніцу па комплекснай уборцы Тамару Козіну, якія, у сваю чаргу, «вылучылі» кандыдатуру Савановіча. Праўда, самі гэтыя людзі, як сцвярджаюць аўтары заявы ў пракуратуру, пра Савановіча нават ні разу не чулі.

Карэспандэнт TUT.BY звязаўся з дырэктарам ЖЭС-48ЖРЭА-1 Фрунзенскага раёна Мінска Ганнай Ягоршавай.

— Асабіста мне аб правядзенні ў нашым ЖЭС схода па вылучэнні каго-небудзь кандыдатам у дэпутаты нічога не вядома, —

сказала Ганна Мікалаеўна. — Але працаўнікі з такімі прозвішчамі, згаданыя ў паведамленні, у нас сапраўды ёсць. Праўда, майстар Павел Спірын ў цяперашні час на працу не выходзіць, яго месцазнаходжанне невядома, і датэлефанавацца яму мы не можам — мабыць, давядзецца весці гаворку аб прагуле.

У выпадку, калі факт фіктыўнага правядзення сходу па вылучэнні Міхаіла Савановіча кандыдатам у дэпутаты палаты прадстаўнікоў пацвердзіцца ў працэсе пракурорскага расследавання, вынікі выбараў па 104-й Кальварыйскай выбарчай акрузе сталіцы могуць быць перагледжаны.

Нагадаем, прозвішча Савановіча незадоўга да выбараў ужо мільгала ў навінах — з ім так і не змаглі сустрэцца жыхары вуліцы Мельнікайтэ, якія пратэстуюць супраць ушчыльнення свайго двара чарговым бізнэс-цэнтрам з казіно, рашэнне аб будаўніцтве якога было ўхвалена Мінгарсаветам, дзе працаваў старшынёй менавіта Савановіч.

Tut.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ