«Той, хто заклікае да байкоту матчаў футбольнай зборнай, заклікае ісці супраць краіны» 13

Той, хто заклікае да байкоту матчаў футбольнай зборнай, заклікае ісці супраць краіны, заявіў першы намеснік старшыні Беларускай федэрацыі футбола Сяргей Сафар’ян 28 верасня ў Мінску на прэс-канферэнцыі, прысвечанай падрыхтоўцы да адборачных матчаў чэмпіянату свету супраць Іспаніі (12 кастрычніка) і Грузіі (16 кастрычніка).

Такім чынам Сафар’ян пракаментаваў заклік буйной фанацкай групоўкі Б-12 не хадзіць на гульню з іспанцамі ў знак пратэсту супраць высокіх цэн на білеты, занадта жорсткай, паводле яе меркавання, працэдуры агляду каля ўваходаў на стадыён «Дынама» і «хамскіх паводзін міліцыі».

Прадстаўнік БФФ падкрэсліў, што нацыянальная зборная — гэта не каманда кіраўніцтва федэрацыі футбола. Паводле яго слоў, для балельшчыкаў будзе зроблена больш, чым звычайна: кожны бясплатна атрымае праграмку да матча, на кожным крэсле будзе поліэтыленавы пакет, плануецца праца 20 гандлёвых кропак. «Калі гэта акцыя супраць мяне, то можна прыйсці да мяне ў кабінет і не даць мне працаваць. Я гэта зразумею. Можна праткнуць шыны аўтамабіля, на якім я езджу. Суб’ект пратэсту выбраны няправільна. Прычым выбраны ў самым цікавым матчы», — заявіў Сафар’ян. Высокія цэны на білеты за варотамі ён растлумачыў імкненнем пазбегнуць перапродажу білетаў на гэтыя сектары.

Генеральны дырэктар БФФ Андрэй Сідарэня паведаміў, што на матчы з Іспаніяй і Грузіяй прададзена прыкладна 1.300 білетных пакетаў (кошт ад 280 да 480 тыс. рублёў). Цэны на білеты зніжаць не плануецца.

Дзмітрый Уласаў, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ