Дэпутаты палаты прадстаўнікоў на пасяджэнні 2 кастрычніка прынялі ў першым чытанні праект закона «Аб рэспубліканскім бюджэце на 2013 год».
Як паведаміў міністр фінансаў Андрэй Харкавец, праект бюджэту сфарміраваны зыходзячы з росту ВУП у 108,5% да ўзроўню 2012 года. «Прынцыпова важна, каб рост ВУП дасягаўся за кошт выканання сукупнасці ўсіх паказчыкаў, але не за кошт празмернага стымулявання ўнутранага попыту, не за кошт накаплення ўнутраных і знешніх даўгоў», — сказаў ён.
Паводле слоў Харкаўца, «неабходна мабілізаваць уласны нерэалізаваны патэнцыял росту, а таксама шырокія інвестыцыйныя магчымасці замежнага капіталу як інструмента глыбокай інтэграцыі беларускай эканомікі ў сусветную».
Кансалідаваны бюджэт на 2013 год прагназуецца ў 197 трлн. 410,8 млрд. рублёў, ці 31,3% да ВУП.
Даходы па праекце рэспубліканскага бюджэту на 2013 год прадугледжваюцца ў 121 трлн. 720,3 млрд. рублёў, ці з ростам да чаканага выканання бюджэту 2012 года на 26,1%.
Асноўнымі крыніцамі падатковых даходаў бюджэту з’яўляюцца падатак на дададзены кошт, акцызы і падаткі на знешнеэканамічную дзейнасць.
Расходы кансалідаванага бюджэту на 2013 год прагназуюцца ў 197 трлн. 410,8 млрд. рублёў, ці 32% да ВУП.
Расходы рэспубліканскага бюджэту на 2013 год сфарміраваны ў 21 трлн. 720,3 млрд. рублёў, ці з ростам да чаканага выканання бюджэту 2012 года на 26,1%.
Харкавец паведаміў, што ў 2013 годзе захаваецца сацыяльная накіраванасць бюджэту. У прыватнасці, значную частку ў бюджэце складуць расходы на аплату працы, пенсіі, стыпендыі, дапамогі і іншыя выплаты.
Міністр фінансаў падкрэсліў, што ў законапраекце прапісаны «аптымальны варыянт выкарыстання бюджэтных сродкаў».
Плануецца, што ў другім чытанні праект бюджэту будзе разгледжаны на пасяджэнні 8 кастрычніка.