Радыкальныя перамены ва ўкраінскай апазіцыі: Клічко выйшаў у фаварыты выбарчай гонкі

Праз два тыдні, 28 кастрычніка, ва Украіне адбудуцца парламенцкія выбары. Выбары ў суседзяў, нагадаем, адбываюцца паводле змяшанай сістэмы: палову дэпутатаў абіраюць па акругах (як у Беларусі), другую палову — па спісах партыяў, якія атрымалі больш за 5% галасоў.

Апошнія рэйтынгі фіксуюць, што па спісах у Вярхоўную Раду трапляюць пяць партыяў.

Так, паводле вынікаў апытання Кіеўскага міжнароднага інстытута сацыялогіі і фонду «Дэмакратычныя ініцыятывы», уладная Партыя рэгіёнаў мае амаль 31% падтрымкі і ёсць лідарам электаральных сімпатыяў. А вось

сярод выбарцаў апазіцыі за час кампаніі адбыліся сур’ёзныя змены.

У асноўным нявызначаны электарат перайшоў да партыі «Удар» баксёра Віталя Клічко, якога сацыёлагаі ставяць на другім месцы з 21,5%. Трапляе ў Вярхоўную Раду і нацыяналістычная партыя «Свабода», якая мае 6,7%.

Амаль страціла шанцы на праходжанне ў Раду Наталля Каралеўская і яе партыя «Украіна — наперад!». Маштабная рэкламная кампанія мела толькі адваротны эфект; за месяц партыя страціла амаль палову прыхільнікаў.

І хоць шмат выбарцаў поўдня ды ўсходу, якія раней падтрымлівалі Партыю рэгіёнаў, не задаволеныя ўладай, мала хто з іх збіраецца галасаваць за апазіцыйныя сілы кшталту «Удару», «Бацькаўшчыны» ці «Свабоды»: бальшыня альбо не пойдзе на выбары, альбо будзе галасаваць за камуністаў, якія маюць рэкордныя 13,3%.

Таксама без шанцаў на месца ў Радзе па спісе і «Наша Украіна» колішняга прэзідэнта Віктара Юшчанкі. Фактычна, «Наша Украіна» на гэтых выбарах ёсць тэхнічным праектам, які падтрымліваецца ўладай з мэтай адарваць некалькі адсоткаў апазіцыйных галасоў.

Выбары ў акругах

Па спісах апазіцыйныя партыі («Удар», «Бацькаўшчына» і «Свабода») атрымліваюць больш, чым улада: разам апазіцыйныя сілы, якія праходзяць пяціадсоткавы бар’ер, маюць 48% супраць 44% у Партыі рэгіёнаў ды камуністаў. Але па акругах сітуацыя для апазіцыі нашмат горшая.

На старце «Бацькаўшчыне» і «Свабодзе» ўдалося дамовіцца пра ўзгадненне кандыдатаў.

Цяпер «Бацькаўшчына» і «Удар» спрабуюць дамовіцца паміж сабой, каб зняць кандыдатуры на карысць больш рэйтынгавага кандыдата, але тэхнічна гэта вельмі складана рэалізаваць, замінаюць амбіцыі з абодвух бакоў.

Апрача таго, большасць вядомых апазіцыйных палітыкаў не захацела рызыкаваць і вырашыла пайсці па спісах партыяў, а не па акругах. Варта сказаць, што закон не дазваляе балатавацца адначасова па спісе і па акрузе, таму кожны мусіў выбраць.

У той жа час улады выкарысталі праблемы ў апазіцыйным лагеры на сваю карысць.

Там, дзе падтрымка Партыі рэгіёнаў у грамадстве нізкая, фактычнымі кандыдатамі ад улады сталі «самавылучэнцы», якія актыўна раздаюць прадуктовыя наборы, грошы, праводзяць сацыяльныя мерапрыемствы

Усё гэта дае падставы лічыць, што

апазіцыя хутчэй за ўсё ў выніку прайграе мажарытарную частку выбараў.

Фактычна, барацьба ідзе за тое, ці будзе ў Партыі рэгіёнаў і ў камуністаў канстытуцыйная большасць — 300 мандатаў.

Канстытуцыйная большасць адкрывае для ўладаў магчымасць правесці змены ў Канстытуцыю, знішчыць усенародныя выбары прэзідэнта і перанесці іх у парламент.

З іншага боку, калі ўлада гэтага зрабіць усё-такі не здолее, то вельмі высокія шанцы на тое, што Януковіч прайграе выбары 2015 года адзінаму кандыдату ад апазіцыі.

Кожныя выбары ва Украіне — гэта цывілізацыйны выбар: паміж Усходам і Захадам, Еўропай і Еўразіяй, мовай і языком.

Як скончыцца чарговы этап гэтага двубою, стане вядома неўзабаве.

Для даведкі: на апошніх выбарах 2007 года Партыя рэгіёнаў мела 34,37%, «Бацькаўшчына» — 30,71%, 14,15% было ў «Нашай Украіны — Народнай Самаабароны», 5,39% — у камуністаў, 3,96% — у Блока Літвіна. Сацыялісты атрымалі 2,86%, прагрэсіўныя сацыялісты — 1,32%, «Свабода» — 0,76%. Астатнія мелі менш за 0,5% галасоў.

• 0
• 0
• 0
• 0
• 0
• 0
• 0
• 0