Мінск зараз будзе пашырацца на ўсход 9

У Мінску ў бліжэйшы час будуць будаваць жыллё за межамі МКАД ва ўсходнім сектары.

Аб гэтым паведаміў намеснік прэм’ер-міністра Беларусі Анатоль Калінін у ходзе жывой лініі ў газеце «Рэспубліка».

Для Мінска існуе чатыры планіровачныя паясы.

Першы ўключае цэнтральную частку горада і абмяжоўваецца першым транспартным кальцом, другі — ад першага да другога транспартнага кальца. Трэці пояс займае тэрыторыю ад другога транспартнага кальца да МКАД, а чацвёрты — ад кальцавой да мяжы перспектыўнай гарадской лініі. Акрамя таго, асваенне тэрыторый пад жыллёвае будаўніцтва прадугледжвае сем сектараў: паўночна-ўсходні, усходні, паўднёва-ўсходні, паўднёвы, паўднёва-заходні, заходні і паўночна-заходні. «Пакуль для жыллёвага будаўніцтва завяршаецца асваенне тэрыторый існуючай жылой забудовы, што рэканструююцца і ўшчыльняюцца, тэрыторый новых жылых раёнаў, якія размешчаны ў першым, другім і трэцім поясе. Але ўказам Прэзідэнта ад 26 сакавіка 2012 года нумар 141 у гарадскую мяжу Мінска ўключана тэрыторыя агульнай плошчай 4 тыс.га з зямель Мінскага раёна. Такім чынам, у бліжэйшы час жыллёвае будаўніцтва будзе праводзіцца за межамі МКАД ва ўсходнім сектары», — паведаміў віцэ-прэм’ер.

Анатоль Калінін адзначыў, што эфектыўнае кіраванне тэрытарыяльным развіццём населеных пунктаў краіны ў сучасных дынамічных сацыяльных, эканамічных і тэхналагічных умовах павінна ажыццяўляцца на аснове горадабудаўнічых праектаў. Генеральным планам па развіццю Мінска прадугледжаны тэрытарыяльны рост сталіцы. Калі ў 2006 годзе яна займала 30,6 тыс.га, то да 2015 года дарасце да 34 тыс.га, а да 2030-га — да 54,2 тыс.га, паведаміў намеснік прэм’ер-міністра.-

БелТА

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ