Алег Навіцкі стаіць справа.
З касмадрома Байканур да Міжнароднай касмічнай станцыі 23 кастрычніка адправіўся карабель «Саюз ТМА-06 М» пад кіраўніцтвам ураджэнца Беларусі Алега Навіцкага.
Пуск ракеты касмічнага прызначэння «Саюз-ФГ» з транспартным пілатаваным караблём «Саюз ТМА-06 М» і экіпажам ў складзе камандзіра Алега Навіцкага, бортінжынер Яўгена Тарэлкіна і Кевіна Форда (астранаўт НАСА) прайшоў паспяхова.
Алег Навіцкі нарадзіўся 12 кастрычніка 1971 года ў Чэрвені (Мінская вобласць). У 1994 годзе скончыў Качынскае авіяцыйнае вучылішча, у 2006 годзе — Ваенна-паветраную акадэмію імя Гагарына. З лістапада 1995 года па верасень 2004 года служыў на пасадзе лётчыка, старшага лётчыка, камандзіра звяна, намесніка камандзіра авіяцыйнай эскадрыллі штурмавога авіяцыйнага палка (ШАП) 4-й паветранай арміі (ПА) і 4-й арміі ВПС і СПА (Паўночна-Каўказская ваенная акруга, штаб у Растове-на-Доне). Асвоіў самалёты Л-39, Су-25, агульны налёт — 680 гадзін. Браў удзел у контртэрарыстычнай аперацыі ў Чачні. Пасля заканчэння акадэміі ў 2006 годзе служыў камандзірам авіяцыйнай эскадрыллі ШАП 4-й арміі ВПС і СПА. У атрад касманаўтаў уключаны 7 лютага 2007 года (14-ы набор).
У часы СССР у космасе пабывалі 2 выхадцы з Беларусі
— Пётр Клімук (здзейсніў тры палёты: у 1973, 1975 і 1978 гадах) і Уладзімір Кавалёнак (таксама тры палёты: у 1977, 1978 і 1981 гадах). Абодва яны двойчы Героі Савецкага Саюза,
генерал-палкоўнікі авіяцыі ў адстаўцы. Плюс дачкой выхадцаў з Беларусі была першая жанчына-касманаўтка Валянціна Церашкова.
БелаПАН
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
