У Першай прыватнай гімназіі Прагі, якая належыць сыну прэзідэнта Чэхіі Вацлава Клаўса, 14 лістапада адбыўся Беларускі дзень. Ён быў прысвечаны палітвязням Беларусі. Лекцыю «Пераслед беларускай моладзі» прачытаў былы актывіст Моладзі БНФ, а цяпер супрацоўнік радыё «Свабода» Франак Вячорка. Як пішуць ягоныя сябры ў сацыяльных сетках, аб рэпрэсіях у Беларусі ён распавёў «на сваім ўласным прыкладзе».
Тамсама адбыліся фотавернісаж «Лісты палітвязняў: мужнасць і смутак» Андрэя Дубініна, лекцыя Наталлі Маковік «Несвабода ў Беларусі», прысвечаная перыяду 1994–2012 гадоў, дыскусія «Як падтрымаць беларускіх палітвязняў».
Усё гэта арганізавала «Асацыяцыя за мадэрнізацыю» палітэмігранта Алеся Міхалевіча.
Чэхі з вялікім разуменнем ставяцца да сённяшняй сітуацыі ў Беларусі, бо самі доўгі час пражылі пры несвабодзе і ва ўмовах нацыянальнай дыскрымінацыі.
