Са студзеня па кастрычнік ДАІ затрымала 40 тысяч п'яных кіроўцаў

За 10 месяцаў гэтага года супрацоўнікі дарожна-патрульнай службы ДАІ затрымалі больш як 40 тысяч нецвярозых кіроўцаў. Пра гэта паведамілі ва ўпраўленні Дзяржаўтаінспекцыі МУС Беларусі.

Там адзначылі, што, паводле статыстыкі, з агульнага масіву дарожна-транспартных здарэнняў з загінулымі і пацярпелымі у 14% ДТЗ вінаватыя кіроўцы, якія знаходзіліся пад уздзеяннем спіртнога. Сёлета п’янымі вадзіцелямі было ўчынена 546 ДТЗ, у выніку якіх загінулі 140 і атрымалі раненні 612 чалавек.

Рэцыдыўнасць гэтага віду парушэнняў вялікая: практычна кожны дзясяты парушальнік пасля прыцягнення да адміністрацыйнай адказнасці сядае за руль у п’яным выглядзе паўторна на працягу года.

Паводле інфармацыі УДАІ МУС, за мінулую пятніцу і ў выхадныя дні на дарогах краіны зарэгістравана 879 ДТЗ з матэрыяльным уронам. Учынена 49 ДТЗ (з іх чатыры ў стане алкагольнага ап’янення), у якіх 10 чалавек загінулі, 51 атрымаў раненні.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ