Раскладушка
Пекла. Пячора для самых страшных тыранаў, дзе яны смажацца. Але раз на год, на Каляды, і для іх бывае палёгка. Ляжаць Гітлер і Сталін на патэльнях, адпачываюць. Тут у закутку раздаецца нейкі шоргат.
Сталін: Таваршч Гітлер, ідзіце паглядзіце, што там такое?
Гітлер здымае бот, кідае ў закуток. Шоргат спыняецца. Але празь нейкі час раздаецца ізноў.
- Таварышч Гітлер, ідзіце паглядзіце што за пацук там!
Гітлер здымае другі бот, кідае. Але, калі шоргат ізноў аднаўляецца, вымушаны адправіцца ў закуток.
Вяртаецца, супакоены, да патэльняў:
- Нічога страшнага, Іёсіф Вісарыёныч, гэта […] з раскладушкай прыпёрся.
Любоў у сама інтымных падрабязнасьцях
У вёску прыехалі лектары, каб прачытаць даклад: “Любоў у сама інтымных падрабязнасьцях” з дэманстрацыяй слайдаў.
У вясковы клюб набіўся зацікаўлены народ.
Выступае лектар:
Ёсьць любоў паміж мужчынам і жанчынай… Гэта вы ведаеце, і мы на ёй спыняцца ня будзем. Ёсьць любоў паміж мужчынамі і паміж жанчынамі… пра гэта таксама цяпер гавораць. Але ёсьць найвышэйшая форма любові – любоў народа да прэзыдэнцкае вэртыкалі.
Вася, давай слайды!
Лепшы помнік беларускаму народу
У Беларусі абвясьцілі конкурс на лепшы помнік беларускаму народу.
Пасьля доўгага й узважлівага абмеркаваньня трэцяе месца на конкурсе “на лепшы помнік беларускаму народу” заняла кампазыцыя: “А.Р.Лукашэнка слухае беларускі народ”.
Другое месца заслужыла кампазыцыя: “Беларускі народ слухае А.Р.Лукашэнку”.
Але першае месца ў конкурсе “на лепшы помнік беларускаму народу” заслужана атрымала статуя: “Першы прэзыдэнт Рэспублікі Беларусь Аляксандар Рыгоравіч Лукашэнка слухае Аляксандра Рыгоравіча Лукашэнку”.
