Практычна ўсе матчы шостага туру скончыліся лягічна, хаця не зусім чакана. Наўрад ці ў нейкай з каманд зьявіцца жаданьне абскарджваць вынікі гэтага туру.
Сваё лідэрства яшчэ больш умацаваў БАТЭ. Барысаўцы на хатнім стадыёне не пакінулі надзеі на станоўчы вынік ждановіцкай «Дарыдзе». БАТЭ пераўзыходзіў суперніка ва ўсіх кампанэнтах гульні. Ужо ў першай палове матча лік быў 2:0 на карысьць БАТЭ, але на апошняй хвіліне першага тайму Місюк падарыў «мінэральным» надзею, якая ня спраўдзілася. У другім тайме Віталь Радзівонаў забіў два галы, аформіўшы хет‑трык (тры галы за гульню) — 4:1.
Асноўны прасьледвальнік БАТЭ менскі МТЗ‑РІПА прайграў у Горадні. Відавочна, што Людас Румбуціс зрабіў зь «Нёмана» каманду, якая будзе змагацца за мэдалі — 2:1 перамаглі гарадзенцы.
Менскае «Дынама» нечакана, але заслужана перамагла салігорскі «Шахцёр» — 1:0. Відавочна, што абодва прызэры леташняга чэмпіянату пакуль не ў найлепшых кандыцыях.
«Гомель» жорстка абышоўся зь «Менскам» — 6:2. Дубль зрабіў найлепшы бамбардзір першынства Раман Васілюк.
На апошнім месцы па‑ранейшаму знаходзіцца «Віцебск», які дома сыграў унічыю з жодзінскім «Тарпэда» — 1:1.
Астатнія матчы туру прынесьлі наступныя вынікі: «Смургоні» — «Дынама» (Берасьце) 1:0, «Дняпро» — «Нафтан» 0:0.
Турнірная табліца пасьля шасьці тураў выглядае наступным чынам: БАТЭ — 15 пунктаў, «Гомель», «Нёман», МТЗ‑РІПА — па 11, «Тарпэда» — 9, «Шахцёр», «Смургоні», «Дынама» (Берасьце) — па 8, «Дарыда», «Дынама» (Менск) — па 7, «Дняпро» — 6, «Менск» — 5, «Нафтан» — 4, «Віцебск» — 3.
Найлепшы бамбардзір Раман Васілюк (Гомель) — 8 галоў.
Зьміцер Панкавец
