Адам Глёбус
Інтымнае
Тэкстуальныя кантамінацыі, зробленыя на маргінэсе афарызмаў Франсуа дэ Лярошфуко
***
Сустракаць даўнюю каханку крышку сорамна.
***
Каханьне — ахова спакою любімай істоты.
***
Звычайна дапамагаеш толькі таму, што сам спадзяесься на дапамогу.
***
Калі пачнеш разглядаць каханьне з гледзішча навукі, а не эротыкі, дык можаш цалкам пагадзіцца з выказваньнем Ларошфуко: "Каханьне дакладней за ўсё параўноўваць з гарачкаю: цяжар і працягласьць іх ніколі не залежаць ад нашае волі". Але зводзіць эротыку да мэдыцыны — недаравальная загана абмежаваных матэрыялістаў.
***
Кастапраў і ў каханьні бачыць наступствы хваробы хрыбетніка.
***
Не патрабуй праўды ад каханкі — шчырасьць разбурае каханьне.
***
У палымянасьці страсьцей можаш і не заўважыць болю, які прычыняеш любімаму чалавеку.
***
Рэўнасьць — рашучы крок да страты каханьня.
***
Пра недахопы каханкі гавораць у мінулым часе, як і пра яе цудоўныя якасьці, бо каханка ў сапраўднасьці — таямніца за сямю пячаткамі.
***
Самая раўнівая жонка, як вядзецца — нечая кінутая каханка.