пазытывы
Добрага здароўіца
Да эпідэміі грыпу сёлета ідзе падрыхтоўка, як да якога рэфэрэндуму. Ахоп насельніцтва хваробай плянуецца аналягічны. Паведамленьні СМІ. Афіцыйныя ўлёткі. Зьявіліся нават «нефармалы»: па тралейбусах сноўдаюцца агенты кампаніяў, здольных даставіць вам дахаты што заўгодна, абы шаноўны кліент не апынуўся ў асяродзьдзі носьбітаў злоснага вірусу.
Спэцыяльнай дзяржаўнай статыстыкі асобна па грыпе ваш карэспандэнт шукаць ня стаў. Здаецца, нават спэцыялісту не заўсёды лёгка зразумець, на што пакутуе пацыент: на грып, ці ВРВІ. Тым больш, што пры вызначэньні дыягназу ўчастковы эскуляп часьцей за ўсё з прыбораў мае тэрмомэтар і лісток непрацаздольнасьці, а пад дзьвярыма ягонага офісу гамоніць агрэсіўная чарга.
Відавочна, што ў распаўсюджаньні хваробы назіраюцца вялікія ваганьні ад году да году. Зразумела таксама, што гэткія рэчы, як эпідэміі, зьвязаныя з эканомікай вельмі ўскосна. Наш славуты зямляк, бацька космабіялёгіі А.Чыжэўскі суадносіў іх са зьмяненьнямі інтэнсыўнасьці прамянёў і хваляў з космасу. Паводле ягонай тэорыі, наступным годам імавернасьць мацнейшай за сярэднюю хвалі захворваньняў вышэй, чым сёлета.
Але нябачныя хвалі, прамяні і розныя там імавернасьці далёкія ад інтэрэсаў паспалітага чалавека. Начальства — крыху бліжэйшае за космас. Яно ўплывае на грып празь дзяржаўны бюджэт. За грошы, сабраныя ў ім з нас, грэшнікаў, жывуць 43000 лекараў і 110000 іхных памочнікаў.
З улікам усіх крыніцаў фінансаваньня бюджэт сыстэмы аховы здароўя вызначаны ў памеры прыкладна 5% ад ВУП, што складае блізка 78% ад таго, што патрэбна галіне, паведаміла начальнік плянава-эканамічнага ўпраўленьня Мінздраву К.Маўчан.
Мы павінны радавацца з усім Мінздравам, бо атрымаем ня меней, чым трэба, а болей, чым летась, калі дзяржаўныя выдаткі на ахову здароўя складалі прыблізна 4% ад ВУП.
Дарэчы, радасьць лекараў не бязьмежная. Ім крыўдна, што тыя, хто штодня скардзіцца ім на здароўе, у сярэднім зарабляюць на 30% болей. Пра мэдыкаў, якія толькі распачалі сваю практыку, і казаць няма чаго. У кастрычніку 1999 г. яны атрымалі па 9 мільёнаў.
Ежце, адным словам, ад грыпу часнык.
Міхал Залескі